Sənaye və energetika

Ana səhifə

Yunanıstan Azərbaycan qazını TGI boru kəmərinə cəlb etməkdə israrlıdır

24 oktyabr 2011 10:39 (UTC +04:00)

«APA-Economics»in məlumatına görə, bunu jurnalistlərə Bakıda səfərdə olan Yunanıstanın ətraf mühit, enerji və iqlim dəyişikliyi naziri Corc Papakonstantinu bildirib.

Səfər zamanı nazirin Azərbaycan prezidenti İlham Əliyev və enerji naziri Natiq Əliyev ilə görüşəcəyi gözlənilir. Görüşlərdə əsas məqsəd «Şahdəniz» qazının Avropaya nəqli ilə bağlı gündəmdə olan kəmərlər barədə fikir mübadiləsi aparmaqdır: «Əsas məqsəd TGI layihəsinin üstünlüklərini Azərbaycan tərəfinin diqqətinə çatdırmaqdır. Düşünürəm ki, təklif etdiyimiz bu sistem həm Azərbaycan, həm Avropa, həm də konsorsium üçün qazın nəqli üçün ən optimal və dolğun variantlardan biridir».

Nazir Yunanıstan tərəfinin TGI kəmərinin iqtisadi tərəflərinin digər layihələrə nisbətən daha üstün olmasını hesab etdiyini bildirib: «Əlbəttə, biz bu kəmərin iqtisadi tərəfinin daha əhəmiyyətli olduğunu da qabarda bilərdik, amma bildirmək istəyirik ki, bu layihə ilk növbədə iki ölkə üçün strateji baxımdan maraqlıdır. Bu iki ölkə arasında strateji əlaqələri möhkəmləndirəcək».

C.Papakonstantinu TGI layihəsinin digər layihələrdən üstünlükləri ilə bağlı Yunanıstan tərəfinin mövqeyini xatırladaraq bildirib ki, bu, kəmərin daha tez reallaşması imkanları ilə bağlıdır: «TGI Avropa və Balkan ölkələrinə 2012-2013-cü ildən qazın nəqlinə hazırdır. Deməli, «Şahdəniz» qazının 2017-ci ildəki nəqlinə də hazır olacaq».

Nazirin sözlərinə görə, ikinci məsələ müştərilərin çoxluğu və çoxşaxəliyidir. Qonaq vurğulayıb ki, layihə seçimi edilərkən həmin layihənin daha çox məntəqəyə getməsi və daşa çox ölkəyə qax ixrac etməsi imkanları üstünlük kimi qiymətləndiriləcək: «Hazırda Bolqarıstanla bağlantının mövcudluğu və İtaliya ilə bağlantı qurmaq imkanları bu üstünlükləri əks etdirir».

Bundan başqa, Yunanıstan naziri TGI kəmərini digər layihələrdən daha real olduğunu bildirib: «İndi masa üzərində digər layihələr də var. Amma onların reallaşması yalnız yaxın müddət ərzində baş tuta biləcək. Hazırda qazın ixracı üçün real imkanı olan yalnız TGI layihəsidir».

C.Papakonstantinu TGI-nin maliyyələşdirilməsində də problemin olmayacağını bildirib. Onun sözlərinə görə, layihənin reallaşmasına 1,5-2 mlrd. dollar kifayətdir. Artıq bu məbləğin 1 mlrd. dollarının Avropa İttifaqındakı mənbələr tərəfindən ayrılacağı ilə bağlı zəmanətlər var: «Məbləğin digər hissəsi Avropa Yenidənqurma və İnkişaf Bankı, eləcə də layihənin iştirakçıları tərəfindən, o cümlədən Yunanıstanın DEPA şirkəti tərəfindən ödənilə bilər». DEPA-nın ödəniş qabiliyyətinin olduğunu bildirən nazirin sözlərinə görə, hazırda şirkətin borcları sıfır həddindədir.