Sənaye və energetika

Ana səhifə

DEPA: “Nabucco” Azərbaycan qazının nəqli üçün TGI-dən sonrakı mərhələ ola bilər

24 oktyabr 2011 11:16 (UTC +04:00)

İlk mərhələ çün ən yaxşı variant isə TGI (Türkiyə-Yunanıstan-İtaliya) boru kəməridir. “APA-Economics”in xəbərinə görə, bu barədə Yunanıstanın DEPA şirkətinin prezidenti Harris Sacinis bildirib.

«Biz Cənub-Şərqi Avropa ölkələrinin qazla təminatına 2012-2013-cü ildən etibarən başlamağa hazırıq. “Şahdəniz” qazı nəql olunmağa başlayanda isə biz bu qazı İtaliya və onun vasitəsilə digər Avropa ölkələrinə çatdıra bilərik. Bizim layihə ən real və dolğun layihədir» - deyə H.Saciniş qeyd edib.

ITGI üzrə işlərin tez və daha ucuz başa gələcəyini xatırladaq H.Saçinis bildirib ki, layihə üzrə texniki-mühəndislik işlərinin və dənizin altında aparılacaq işlərin (Yunanıstan-İtaliya kəmərinin çəkilməsi) texniki-iqtisadi əsaslandırması artıq həyata keçirilib: «Eləcə də ətraf mühit və iqlimlə bağlı müəyyən bazanın hazırlanmasına başlamışıq».

Onun sözlərinə görə, birinci mərhələdə ITGI 10 mlrd. kubmetr qazın nəqlinə imkan verəcək: «Artıq 10 mlrd. kubmetr qazın ixracı ilə bağlı müəyyən imkanlar var. İlkin variantda 1 mlrd. kubmetr Bolqarıstana, 1 mlrd. kubmetr digər Cənub-Şərqi Avropa ölkələrinə, 8 mlrd. kubmetr isə İtaliya və oradan keçməklə digər ölkələrə gedəcək. Amma biz bu nisbətləri lazım olsa, dəyişə bilərik».

DEPA rəhbəri ITGI-nin əsas üstünlüklərindən biri kimi onun genişlənə bilmə imkanlarını qeyd edib: «Məsələn, Yunanıstana verilən qazın həcmini 3 mlrd. kubmetrə, İtaliyaya verilən qazın həcmini 16 mlrd. mlrd. kubmetrə qədər qaldıra bilərik. Ümumilikdə bizim ixrac həcmimiz 24 mlrd. kubmetrə çatdırıla bilər ki, bu da digərləri ilə müqayisədə çox böyükdür. Üstəlik, genişlənmə işləri o qədər də çox vəsait tələb etməyəcək - buna 5% artıq xərc tələb olunacaq».

H.Saçinis bildirib ki, nəql olunan qazın həcmi bundan da çox olarsa, ikinci mərhələ kimi “Nabucco” layihəsini götürmək olar: «Biz “Nabucco”nu bu layihənin davamı kimi təqdim edə bilərik. Yəni həcmlər artsa, biz “Nabucco” layihəsi fazasına başlaya bilərik».