Sənaye və energetika

Ana səhifə

«Şahdəniz» qazının Avropaya nəqli üçün 4 ixrac variantına baxılır

24 noyabr 2011 11:53 (UTC +04:00)

Bakı. Əli Əhmədov – APA-Economics. Bu ilin yanvar-sentyabr ayları ərzində Xəzərin Azərbaycan sektorunda yerləşən «Şahdəniz» yatağından 4,53 mlrd. kubmetr qaz və 1,2 mln. ton kondensat hasil edilib. Layihənin operatoru olan «BP-Azerbaijan» şirkətindən «APA-Economics»ə verilən məlumata görə, ilk 9 ayda yataqdan gündəlik hasilat 16,6 mln. kubmetr qaz və 35 min barel kondensat təşkil edib.

Növbəti illər ərzində platformadan qazılacaq yeni quyular işə salındıqca hasilatın artacağı gözlənilir. Hazırda «Mərhələ 1»də hasilatın ən yüksək sabit səviyyəsinin ildə təqribən 9 mlrd. kubmetr qaz və gündə təxminən 50 min barel kondensat olacağı gözlənilir.

İlk üç rüb ərzində «Şahdəniz» üzrə fəaliyyətə 139,1 mln. dollar həcmində əməliyyat xərcləri və 467 mln. dollar əsaslı xərclər çəkilib. Bütün il üçün bu rəqəmlərin müvafiq olaraq 169,9 mln. və 791,6 mln. dollar olacağı gözlənilir.

Paralel olaraq «Mərhələ 2» və ya Yatağın Tammiqyaslı İşlənməsi (YTİ) üzrə işlər davam edir. «BP-Azerbaijan»dan bildirilib ki, layihənin 2-ci mərhələsi işə düşəndən sonra «Mərhələ 1»dən olan ildə təqribən 9 mlrd. kubmetr qaza ildə 16 mlrd. kubmetr qaz əlavə ediləcəyi gözlənilir.

İkinci mərhələyə körpü ilə birləşdirilmiş iki yeni hasilat platforması, 2 yarımdalma qazma qurğusu vasitəsilə qazılacaq 26 sualtı quyu, suyun 550 metrədək dərinliyində çəkiləcək 500 km sualtı boru kəməri şəbəkəsi, Azərbaycan və Gürcüstanda əlavə ixrac gücü, həmçinin Səngəçal terminalının genişləndirilməsi daxildir.

«BP-Azerbaijan»ın məlumatına görə, hazırda Xəzər dənizindən Avropaya qaz ixracı ilə bağlı təkliflər «Şahdəniz» konsorsiumu tərəfindən qiymətləndirilir və seçim qərarının bu ilin sonunda qəbul ediləcəyi gözlənilir. Həmin təkliflər oktyabr ayının 1-dək «Nabucco», Trans-Adriatik Boru Kəməri və «IGI Poseidon» konsorsiumları tərəfindən təqdim olunub.

«Bundan əlavə, «Şahdəniz» layihəsi qrupu, həmçinin regional olaraq mövcud və ya gələcək interkonnektor infrastruktur sistemi vasitəsilə Cənub-Şərqi Avropadakı bazarlara qaz ixrac edə biləcək dördüncü potensial ixrac variantını da qiymətləndirir», - deyə məlumatda bildirilir.

Xatırladaq ki, «Şahdəniz» layihəsinin səhmdarları BP (operator – 25,5%), «Statoil» (25,5%), ARDNŞ (10%), «LUKoil» (10%), NICO (10%), «Total» (10%) və TPAO (9%) şirkətləridir.