Sənaye və energetika

Ana səhifə

Vaqif Əliyev: «Petkim»in Türkiyə bazarında iştirak payı əhəmiyyətli şəkildə artacaq»

28 noyabr 2011 08:39 (UTC +04:00)

«APA-Economics»in məlumatına görə, bunu «Petkim» şirkəti İdarə Heyətinin sədri, Azərbaycan Dövlət Neft Şirkətinin (ARDNŞ) Sərmayələr İdarəsinin rəisi Vaqif Əliyev bildirib: «Hazırda «Petkim» Türkiyənin neft-kimya bazarında 25% paya malikdir və bunun 40%-ə çatdırılması planlaşdırılır».

V.Əliyev həmçinin bildirib ki, «Petkim»in əsas təsisçilərindən olan ARDNŞ regionun enerji təhlükəsizliyinin təmin olunmasında əhəmiyyətli rol oynayır və artıq tam şəkildə Azərbaycanın enerjiyə olan tələbatını ödəyir.

ARDNŞ rəsmisi vurğulayıb ki, 1997-2010-cu illər ərzində Azərbaycanda neft hasilatı 5,6 dəfə artaraq illik 50 mln. tona, qaz hasilatı isə 2004-2010-cu illərdə 5,2 dəfə artaraq 26 mlrd. kubmetrə çatıb.

Eyni zamanda V.Əliyev ARDNŞ-in xaricdə, o cümlədən Rumıniya, Gürcüstan və digər ölkələrdə həyata keçirdiyi investisiya layihələrdən danışıb və yaxın perspektivdə bu dövlətlərin siyahısının genişlənəcəyini vurğulayıb.

Qeyd edək ki, Türkiyənin Əliağa bölgəsində «Petkim»ə məxsus istehsal sahəsində tikilən Ege Neft Emalı Zavodunun («Star Rafinerisi») inşası təqribən 5 mlrd. dollara başa gələcək. İllik emal gücü 10 mln. ton olan zavodda əsasən «Petkim»in tələbatı olduğu məhsullar istehsal ediləcək. Yeni zavodun tikintisi zəruri olan kimya xammalının idxalını 30% azaldacaq və Türkiyə və regionun neft məhsulları bazarına çıxmaq imkanları yaradacaq. Zavodun ilk qurğularının tikintinin başlanmasında 3 il sonra işə salınması nəzərdə tutulur.

«Petkim»i 2008-ci ilin may ayında satın almış «SOCAR & Turcas» ortaqlığının 2023-cü ilə qədər olan hədəflərinə əsasən, bu neft-kimya şirkətinin Avropanın ən önəmli neft-kimya mərkəzlərindən birinə çevrilməsi planlaşdırılır, 2023-cü ilə qədər şirkətə qoyulan sərmayənin 10 mlrd. dollara çatdırılacağı gözlənilir. Həyata keçiriləcək tədbirlər nəticəsində, şirkətin illik ixracatı 5 mlrd. dollara çatdırılacaq.

«Star» neftayırma zavoduna isə 5 milyard. ABŞ dolları investisiya yatırılacaq ki, bu, Türkiyədə ən böyük sektor yatırımı hesab oluna bilər. İllik istehsal gücü 10 mln. ton olacaq zavod 2015-ci ildə istifadəyə veriləcək. Zavodda inşaat dövründə 10 min nəfər müvəqqəti, istifadəyə veriləndən sonra isə 1000 nəfər daimi işlə təmin olunacaq.

Zavodda «Petkim» üçün LPG və neft, daxili bazar üçünsə dizel yanacağı və təyyarə yanacağı istehsal ediləcək. Zavodda ildə 500 min ton təyyarə yanacağının istehsal olunması planlaşdırılır.