Sənaye və energetika

Ana səhifə

Azərbaycanda alternativ enerji istehsalçılarına vergi güzəştləri verilə bilər

01 dekabr 2011 12:56 (UTC +04:00)

«APA-Economics»in məlumatına görə, bu yeniliklər «Bərpa olunan enerji mənbələrindən istifadə haqqında» qanun layihəsində nəzərdə tutulub.

Qanunda alternativ enerjinin inkişafı üçün göstərilməsi nəzərdə tutulan dövlət dəstəyi tədbirləri sadalanıb. Bu tədbirlərə əsasən, bərpa olunan enerji mənbələrindən elektrik və istilik enerjisi istehsalının stimullaşdırılmasına yönəldilmiş qiymət və tarif siyasətinin həyata keçirilməsi, bu sahəyə dövlət tərəfindən investisiyaların ayrılması və dövlət və özəl müəssisələrin investisiya fəaliyyətinin təşviqi nəzərdə tutulur.

Bundan başqa, qanunda bərpa olunan enerji mənbələri hesabına istehsal olunan elektrik və istilik enerjisinin istehlakçılara maneəsiz çatdırılması üçün təşkilati və iqtisadi tədbirlərin görülməsi məsələləri əksini tapıb.

Adı çəkilən sahə üçün ən böyük dəstək isə bu sahəyə vergi və digər güzəştlərin verilməsi ola bilər. İlkin varianta görə, bu sahədəki istehsalçılara torpaq, əmlak və digər vergi güzəştləri verilə bilər.

Bundan əlavə, bərpa olunan enerji mənbələri hesabına elektrik və istilik enerjisinin istehsalı və ötürülməsi üçün tətbiq edilən avadanlıq, materiallar və cihazların idxalında güzəştli gömrük rüsumları tətbiq oluna bilər.

«Bərpa olunan enerji mənbələrindən istifadə haqqında» qanun layihəsində bərpa olunan enerji mənbələri hesabına elektrik və istilik enerjisi istehsalçıları üçün stimullaşdırıcı təşkilati və maliyyə mexanizminin yaradılması və onların haqsız rəqabətdən müdafiəsi, bu istehsalçılara əlverişli şəraitin yaradılması nəzərdə tutulur.

Bundan başqa, qanun layihəsinə əsasən, dövlət bu sahəyə dəstək vermək üçün hər il dövlət büdcəsində bu sahəyə investisiya qoyuluşları və istehsalçılar üçün vergi güzəştləri nəzərdə tuta bilər.

Nəhayət, sənəd layihəsinə əsasən, bərpa olunan enerji mənbələri hesabına istehsal olunan elektrik və istilik enerjisi üçün istehlak tarifləri qanunvericiliklə müəyyən ediləcək.