Sənaye və energetika

Ana səhifə

Rusiya və Ukrayna arasında qaz danışıqları gələn ilə təxirə salınıb

26 dekabr 2011 13:56 (UTC +04:00)

Bakı - APA-Economics. Rusiya və Ukrayna arasında qaz alqı-satqısına dair danışıqlar gələn il yanvarın 15-də bərpa olunacaq. “APA-Economics”in xəbərinə görə, bu barədə Rusiyanın “Qazprom” şirkəti açıqlama yayıb.

Dekabrın 23-də keçirilən görüşdən sonra “Qazprom”un rəhbəri Aleksey Miller və Ukraynanın energetika və kömür sənayesi naziri Yuri Boyko qaz danışıqlarının növbəti raundunun müsbət perspektivləri olduğunu vurğulayıblar.

Qeyd edək ki, iki ölkə arasında qazın alqı-satqısına dair uzunmüddətli müqavilə 2009-cu ildə Yuliya Timoşenko hökuməti dövründə imzalanıb. Kiyev bu sazişə yenidən baxılmasını təklif edir. Moskva müqaviləyə dəyişiklik edilməsinə razılaşsa da, tərəflər hələlik yekun razılığa gələ bilməyiblər. Bu ilin I rübündə Ukrayna Rusiya qazını 264 dollara, II rübündə 295 dollara, III rübündə 354 dollara, IV rübündə 400 dollara alıb.

Hazırda iki ölkə arasında davam edən qaz mübahisəsinin səbəbi Kiyevin Moskvadan aldığı qazın həcmini 1/3 həcmdə - 40 mlrd. kubmetrdən 27 mlrd. kubmetrə qədər azaltmaq niyyətidir. “Qazprom” şirkəti isə hesab edir ki, hazırda qüvvədə olan müqavilələr Ukraynanın üzərinə aldığı qazın həcmindən asılı olmayaraq, ildə ən azı 33 mlrd. kubmetr qazın dəyərini ödəmək öhdəliyi qoyur.

Ukrayna prezidenti Viktor Yanukoviç bəyan edib ki, Ukraynanın Rusiyadan aldığı qazın qiyməti 250 dollar həddini keçməməlidir. Buna baxmayaraq, Ukraynanın 2012-ci il dövlət büdcəsində Rusiya qazının qiyməti 416 dollar həcmində müəyyənləşdirilib.