Sənaye və energetika

Ana səhifə

“Azərikimya”nın texniki izopropil sexi yenidən qurularaq istifadəyə verilib

09 yanvar 2012 15:44 (UTC +04:00)

Bakı. Əli Əhmədov - APA-Economics. “Azərikimya” İstehsalat Birliyinin sex və istehsalat sahələrində yenidənqurma və modernləşdirmə işləri davam etdirilir.

İB-dən “APA_Economics”ə verilən məlumata görə, birliyin “EP-300” və “Polimir-120” komplekslərində aparılmış genişmiqyaslı əsaslı təmir və yenidənqurma işlərindən sonra bu günlərdə Etilen-polietilen zavodunun texniki izopropil sexi rekonstruksiya olunaraq istifadəyə verilib.

“Azərikimya” İB-nin Təmir-Tikinti, eləcə də Nəqliyyat və Xüsusi Texnika idarələrinin təmir briqadaları tərəfindən aparılan yenidənqurma işlərindən sonra artıq texnoloji qurğuda məhsul istehsalına başlanılıb.

Qeyd edək ki, 1960-cı illərdə istifadəyə verilmiş Texniki izopropil sexində belə bir genişmiqyaslı əsaslı təmir son 20 ildə ilk dəfə həyata keçirilib. Birliyin “Kimyalayihə” İnstitutunun texniki layihəsi əsasında məhsuldarlığın artırılması, keyfiyyətin yüksəldilməsi məqsədilə bir sıra mühüm texniki dəyişikliklər, yeniliklər tətbiq edilib. Müxtəlif kalon və çənlər daha geniş tutumlu yeniləri ilə əvəz olunmuş, xammalın və ilkin məhsulların nəql olunduğu, korroziya və aşınmaya məruz qalmış texnoloji xətlər bütünlüklə təzələnib. Almaniyanın “Lurge” şirkətinin istehsalı olan daha effektiv qızdırıcı kameranın və vakuum sisteminin texnoloji sxemə daxil edilməsi məhsul çıxımının artmasına və keyfiyyətin yaxşılaşmasına zəmin yaradıb. Aparılmış əsaslı təmir və yenidənqurma işlərinin ən mühüm nəticələrindən biri də sexin yerləşdiyi sahənin xeyli azaldılmasıdır ki, bu da texnoloji avadanlığa texniki xidmət səviyyəsinin yüksəldilməsinə, operativliyin artırılmasına, eyni zamanda boşalmış ərazinin yeni istehsalat sahələri üçün daha səmərəli istifadə edilməsinə imkan verəcək.