Sənaye və energetika

Ana səhifə

TAP layihəsinin icraçı direktoru: “Azərbaycandan Avropaya qaz nəqli tenderini udmaq üçün daha da möhkəmlənmişik”

13 yanvar 2012 10:19 (UTC +04:00)

“APA-Economics”in xəbərinə görə, bu barədə TAP layihəsinin icraçı direktoru Kjetil Tungland bildirib.

Onun sözlərinə görə, ötən il kəmərin ərazisindən keçəcəyi tranzit ölkələrin müvafiq orqanlarına ilkin Ətraf Mühit və Sosial Təsirin Qiymətləndirilmələri, üçüncü tərəflər üçün “Third Party Access Exemption” sənədini təqdim edib.

Bundan başqa, il ərzində TAP 5 anlaşma memorandumu imzalayıb: “Bunlardan ən mühümü İAP (İonian Adriatic Pipeline) səhmdarları ilə imzalanandır. Bu, bizim Şərqi Avropa ölkələrinə qaz nəqlinin əsasını qoyma öhdəliyimizi möhkəmləndirir. Səhmdarlarımız Yunanıstan üçün öhdəliyimizi aydın nümayiş etdirmək üçün avqust ayında boru kəmərini ölkə ərazisində əlavə olaraq 30 km artırmağı qərara alıb. TAP layihəsi 1,5 mln. avro daxili investisiya yatıracaq və Yunanıstanda təxminən 2000 iş yeri yaradacaq”.

K.Tungland qeyd edib ki, layihənin ötən ilki fəaliyyətinin kulminasiya nöqtəsi oktyabrın 1-də Azərbaycan qazının Avropaya nəqlinə dair TAP-ın 1000 səhifəlik təklifinin “Şahdəniz” konsorsiumuna təqdim edilməsi olub: “Oktyabrın 27-də TAP Brüsseldə ilk Cənub-Şərqi Avropa Qaz Forumuna ev sahibliyi etdi. Avropa Birliyinin enerji komissarı Günter Ottinger orada bəyan etdi ki, Avropa Komissiyası TAP-a və Cənub-Şərqi Avropada şəbəkəni inkişaf etdirmək üçün işləyən digər layihələrə dəstək verməyə hazırdır. Albaniyanın enerji, ticarət və iqtisadiyyat nazirinin müavini Sokol Dervishaj qeyd etdi ki, TAP “Cənub Qaz Dəhlizi”ndə Avropa Birliyinin məqsədlərini həyata keçirə biləcək yeganə layihədir”.

K.Tunglandın fikrincə, TAP Azərbaycandan qaz nəqli tenderini udmaq üçün əvvəlkinə nisbətən daha da möhkəmlənib: “Biz nümayiş etdirmişik ki, layihəmiz maliyyə, texniki qabiliyyət, marşrut seçimi, ətraf mühit və sosial təsir baxımından ən davamlısıdır. Sonda “Şahdəniz”in bu ilin birinci rübündə yekun qərarını qəbul etməsində uğurlar arzulayıram”.