Sənaye və energetika

Ana səhifə

Son 10 ayda ARDNŞ-a məxsus ərazilərdə 1500 qanunsuz tikili inşa edilib

13 yanvar 2012 15:27 (UTC +04:00)

Bakı. Əli Əhmədov - APA-Economics. Görülən tədbirlərə - məhkəmə iddialarına və söküntü işlərinə baxmayaraq, Azərbaycan Dövlət Neft Şirkətinə (ARDNŞ) məxsus ərazilərdə qanunsuz tikililər davam edir. «APA-Economics»in məlumatına görə, bu barədə bu gün keçirilən mətbuat konfransında ARDNŞ-ın Hüquq idarəsinin rəisi Eldar Orucov bildirib.

Onun sözlərinə görə, ötən ilin mart ayından bu günədək (son 10 ay ərzində) ARDNŞ-a məxsus ərazilərdə qanunsuz olaraq 1521 tikili inşa edilib. Bunların 343-ü «Binəqədi Oil»un ərazisində, 6-sı «Azneftyağ» Neft Emalı Zavodunun, 14-ü «Azəriqaz»ın boru kəmərlərinin mühafizə zolağında, 139-u «Ramana» yatağında tikilib. Bütövlükdə «Azneft» İstehsalat Birliyi ərazisində isə 521 qanunsuz tikili var.

Digər qanunsuz tikililər qaz anbarlarının üzərində və Bibiheybət ərazisindədir. Bu tikililərin bir hissəsinin qarşısı alınıb, digər hissəsi başa çatıb və orda yaşayış başlayıb. İdarə rəisinin sözlərinə görə, buna səbəb yerli əhali ilə qarşıdurmaların yaranmasıdır: «Bizim əməkdaşlar belə hallara nəzarət etmək üçün ərazilərə gedəndə bəzən yerli sakinlərlə qarşıdurmalar yaranır, nəticədə hətta bizim əməkdaşlar xəsarət alırlar və belə hallara axıradək müdaxilə etmək mümkün olmur. Çünki ARDNŞ-ın mühafizə xidməti güc orqanları deyil və son həddə biz geri çəkilməli oluruq».

E.Orucov qeyd edib ki ARDNŞ belə hallarda hüquq-mühafizə orqanlarına müraciət edir: «Dəfələrlə hüquq-mühafizə orqanlarına yazılıb, amma bəzən meydanda bizim əməkdaşlar tək qalırlar, ona görə də bəzi tikililər tikilib başa çatdırılır. Ona görə də indi əsas diqqət belə tikililərə qarşı hüquqi hərəkətlərin aparılması - məhkəmə iddialarının tərtibi və müraciətlərin edilməsinə yönəldilib».