Sənaye və energetika

Ana səhifə

Azərbaycanda «AAC» Müasir Tikinti Materialları Zavodu fəaliyyətə başlayıb

19 yanvar 2012 07:11 (UTC +04:00)

Bakı. Elnur Hüseynquluyev – APA-Economics. Azərbaycanda əhəng, sönmüş əhəng və kərpic istehsal edən «AAC» Müasir Tikinti Materialları Zavodu fəaliyyətə başlayıb. «APA-Economics»in məlumatına görə, zavod tam müasir standartlara cavab verən «gobustone» brendi ilə tanınan bir müəssisədir.

Açılış mərasimində zavodun texnoloji proses üzrə mütəxəssisi Nail Abasov bildirib ki, Qafqazda ilk dəfə Azərbaycanda tikilən «AAC» Müasir Tikinti Materialları Zavodu Almaniyanın məşhur «Wehrhahn» şirkətinin yüksək texnologiyalı istehsal avadanlığı ilə təchiz edilib. Zavod Bakı-Salyan şosesinin 47-ci km-də 10 hektar ərazidə yerləşir. Burada 12 min kvadrat metr qapalı istehsal sahəsi olan məsaməli beton istehsalı zavodu, 6 min kvadratmetr qapalı sahəsi olan yandırılmış və sönmüş əhəng istehsalı zavodu, Böyük Britaniyanın CDE şirkətinin ən son texnoloji avadanlığı ilə təchiz edilmiş 3,6 min kvadratmetr istehsal sahəsi olan kvars qumu yuma zavodu, 8,8 min kvadratmetr sahəsi olan hazır məhsul və 4,5 min kvadratmetr sahəsi olan xammal anbarları yerləşir. «Həmçinin, burada 1,2 min kvadratmetrlik ofis binası, 1,5 min kubmetrlik su anbarı, 300 metr dəmiryolu xətti, 5,4 min kvadratmetr nəqliyyat vasitələrinin saxlanılma və texniki xidməti sahəsi, habelə 2,5 min kvadratmetrlik digər təsərrüfat obyektləri yerləşir. Zavodun sahəsinə 15 min kvadratmetrlik inkişaf ərazisi də daxildir», - deyə N.Abasov qeyd edib.

Daha sonra istehsalat prosesi ilə bağlı məlumat verən N.Abasov məsaməli beton istehsalında yerli xammaldan istifadə olunduğunu qeyd edib: «Bu, əsasən kvars qumu və əhəng daşıdır. Qum Abşeron rayonunda Umbakı kvars qumu yatağından birbaşa zavoda gətirilir. Əhəng daşı isə Qazax rayonunda yerləşən əhəng daşı karxanasından hasil və emal olunduqdan sonra dəmir yolu vasitəsi ilə zavoda çatdırılır».

Zavodun tikinti üzrə meneceri Luts Vaxte isə bildirib ki, zavodda bütün avadanlıqlar alman texnologiyası əsasında qurulub: «Bu texnologiyanın tətbiqi nəticəsində zavodun bütün məhsulları yüksək keyfiyyətlə istehsal olunur».

İstehsal prosesi haqqında ətraflı məlumat verən zavodun Marketinq və satış Departamentinin müdiri Vüqar Həmidov müəssisənin tikintisinə İqtisadi İnkişaf Nazirliyinin Sahibkarlığa Kömək Milli Fondu tərəfindən 10 mln. manat həcmində güzəştli kreditin ayrıldığını, həmçinin «Synerji Group» şirkəti tərəfindən 30 mln. manata yaxın investisiya yatırıldığını bildirib. «Hazırda zavodun məsaməli beton blokları üzrə gündəlik istehsal gücü 600 kvadrat metr təşkil edir. Bundan başqa, «AAC» Müasir Tikinti Materialları Zavodu gündə 100 ton yandırılmış və 120 ton sönmüş əhəng istehsal edir. Yandırılmış və sönmüş əhəng istehsalı «Wehrhahn» şirkətinin qabaqcıl texnologiyası əsasında qurulub. Zavodda həmçinin təchiz edilmiş laboratoriya vasitəsi ilə xammalın və hazır məhsulun keyfiyyətinə tam nəzarət edilir», - deyə V.Həmidov qeyd edib.

Qeyd edək ki, ötən ilin dekabrın 26-da dövlət başçısı İlham Əliyevin iştirakı ilə «AAC» Müasir Tikinti Materialları Zavodunun rəsmi açılış mərasimi keçirilib.