Azərbaycan və Özbəkistan arasında münasibətlərin “əbədi dostluq” mərhələsinə yüksəlməsi siyasi tərəfdaşlıqla yanaşı, iqtisadi və regional əməkdaşlığın da dərinləşməsi üçün yeni imkanlar yaradır.
Bunu APA-ya açıqlamasında özbək politoloq Adkhamjon Janobiddinov deyib.
Onun sözlərinə görə, Əbədi dostluq haqqında Müqavilə iki xalq arasındakı tarixi və mədəni əlaqələrə siyasi ifadə verməklə yanaşı, mövcud etimad və əməkdaşlığın uzunmüddətli qorunması üçün siyasi öhdəlik yaradır.
“Azərbaycan və Özbəkistan strateji mövqelərdə yerləşirlər. Özbəkistan Mərkəzi Asiyanın mərkəzində, Azərbaycan isə Cənubi Qafqaza açılan qapı rolundadır. Bu baxımdan, yeni Müqavilə daha geniş geosiyasi əhəmiyyət daşıyır. Daha sıx siyasi uzlaşma bir-biri ilə daha çox əlaqələndirilmiş regional arxitekturanın formalaşmasına töhfə verə bilər”, – politoloq bildirib.
Janobiddinov qarşılıqlı ticarət dövriyyəsinin 1 milyard dollara çatdırılması hədəfini də real hesab edir.
“2025-ci ildə ikitərəfli ticarət dövriyyəsinin 795 milyon dollara çatdığını nəzərə alsaq, 1 milyard dollarlıq hədəf realdır. Lakin buna nail olmaq üçün əməkdaşlığın daha yüksək əlavə dəyər yaradan sahələrə genişləndirilməsi lazımdır. Avtomobil sənayesi, xüsusilə komponentlərin lokallaşdırılması, elektromobillərin və ixtisaslaşmış nəqliyyat vasitələrinin istehsalı bu baxımdan ən perspektivli istiqamətlərdən biridir”, – o qeyd edib.
Politoloqun fikrincə, energetika, neft-kimya, tekstil, əczaçılıq, elektrotexnika, qida emalı və tikinti materialları da birgə istehsal və ixrac üçün geniş potensiala malikdir. Azərbaycan–Özbəkistan İnvestisiya Şirkəti isə iri və uzunmüddətli sənaye layihələrinin maliyyələşdirilməsi üçün mühüm platformaya çevrilə bilər.
Janobiddinov Orta Dəhlizin inkişafını iqtisadi inteqrasiyanın əsas istiqamətlərindən biri adlandırıb. Onun sözlərinə görə, gömrük prosedurlarının sadələşdirilməsi, rəqəmsal sənədləşmənin genişləndirilməsi, dəmir yolu və liman operatorları arasında koordinasiyanın gücləndirilməsi marşrutun rəqabət qabiliyyətini artıra bilər.
Politoloq Azərbaycanın Mərkəzi Asiya Dövlət Başçılarının Məşvərət Görüşündə tamhüquqlu iştirakının və C5 formatının faktiki C6-ya çevrilməsinin də regional siyasi-iqtisadi arxitekturaya təsir göstərəcəyini bildirib.
“Azərbaycanın Mərkəzi Asiyanın məşvərət formatına daimi şəkildə inteqrasiyası Çinin qərb sərhədindən Avropanın hüdudlarınadək uzanan birbaşa siyasi-iqtisadi məkan yaradır. Azərbaycanın iştirakı C6-nı məşvərət platformasından daha geniş regional diplomatiya mexanizminə çevirə bilər”, – Janobiddinov vurğulayıb.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
