Sosial

Ana səhifə

Sosial

Bakıda “Əlillərin hüquqları haqqında konvensiya: ləyaqət və ədalət hamı üçün” mövzusunda konfrans keçirilib

28 noyabr 2008 13:08 (UTC +04:00)

Bakı. Kəmalə Quliyeva-APA. Bakıda Ümumdünya İnsan hüquqları bəyannaməsinin 60 illiyinə və 3 dekabr Beynəlxalq Əlilliyi olan İnsan Gününə həsr olunmuş “Əlillərin hüquqları haqqında konvensiya: ləyaqət və ədalət hamı üçün” mövzusunda konfrans keçirilib. APA-nın məlumatına görə, konfransda çıxış edən Ombudsman Elmira Süleymanova bildirib ki, cəmiyyətin zəif qrupuna daxil olan insanlar hər zaman cəmiyyətin diqqətində olmalıdır. Əlillərin problemləri ilə bağlı müxtəlif dövlət qurumlarına müraciət etdiyini deyən E. Süleymanova bildirib ki, tibbi-sosial ekspert komissiyalarının işi ilə bağlı ona müraciətlər həddən artıq çoxdur: “Problem bundadır ki, əlilliyin müəyyən olunması meyarları 1997-ci ildə müəyyənləşib və ora müəyyən xəstəliklər salınmayıb. İndi bu qəbildən olan insanlar əziyyət çəkir və müəyyən süründürməçiliklə qarşılaşırlar”.
E. Süleymanovanın sözlərinə görə, onun nəqliyyat naziri Ziya Məmmədova müraciətindən sonra ölkəyə gətirilən avtobuslarda əlilliyi olan insanların minməsi üçün xüsusi şərait yaradılıb. İndiyə qədər ölkəyə 130 belə avtobus gətirilib. İlin sonuna qədər isə dayaq-hərəkət sistemi pozulan insanların sərbəst şəkildə istifadə edə biləcəyi daha 300 avtobusun gətirilməsi nəzərdə tutulur. Ombudsman bildirib ki, Daxili İşlər Nazirliyinə edilmiş müraciətdən sonra paytaxta görmə qüsuru zəif olan insanlar üçün 30-dan çox səsli işıqforlar quraşdırılıb. Onun sözlərinə görə, Rabitə və İnformasiya Texnologiyaları Nazirliyi isə küçələrdəki telefon-danışıq məntəqələrini əlillərin istifadəsi üçün yararlı vəziyyətə salıb. Ombudsman əlil uşaqlara baxan dayələrin əmək haqlarının artırılması ilə bağlı da Nazirlər Kabinetinə müraciət etdiyini də bildirib.
Milli Məclisin Sosial Siyasət Daimi Komissiyasının sədri Hadı Rəcəbli isə bildirib ki, Azərbaycan parlamenti artıq əlilliyi olan insanların hüquqları haqqında konvensiyanı ratifikasiya edib. Komissiya sədri qeyd edib ki, sözügedən konvensiya həddən artıq çətin və maliyyə yüklü olsa da, artıq sənədin nəzərdə tutulan müddəaların icrası baxımından tədbirlər həyata keçirilir. H. Rəcəbli bu il ilk dəfə olaraq Qarabağ Müharibəsi əlillərinə prezident təqaüdünün təsis olunduğunu da xatırladıb.