Sosial

Ana səhifə

Sosial

Azərbaycanda ünvanlı dövlət sosial yardım sistemində müraciət və təyinat mexanizmi təkmilləşdiriləcək

28 noyabr 2008 13:42 (UTC +04:00)

Bakı. İlhamə İsabalayeva - APA-Economics. Azərbaycanda ünvanlı dövlət sosial yardım sistemində ünvanlılıq daha da dəqiqləşdiriləcək, müraciət, təyinat mexanizmi təkmilləşdiriləcək və bunun əhali üçün daha rahat forması müəyyənləşdiriləcək. «APA-Economics»in məlumatına görə, bunu Azərbaycanın əmək və əhalinin sosial müdafiəsi naziri Füzuli Ələkbərov bildirib.
Nazirin sözlərinə görə, hazırda ölkədə ünvanlı yardım alan ailələrin 90%-nin azyaşlı uşaqları var və onların 50%-dən çoxunda uşaqların sayı üçdən çoxdur. Yardım alanlar əsasən, gənc ailələrdir.
Hazırda ünvanlı sosial yardım sisteminin vəziyyətini normal, amma həm də tam yararsız saymayan F.Ələkbərov bildirib ki, Dünya Bankı ƏƏSMN-ın iştirakı olmadan bu sistemlə bağlı monitorinq aparıb və qurum ünvanlılığı çox yüksək qiymətləndirib: «Bəzi neqativ hallara qarşı nazirlik çox sərt addımlar atır. Bu ilin yanvar-sentyabr ayları ərzində 100-dən çox işçi cəzalandırılıb. Nazirlik təkrar araşdırmadan sonra qaydalara uyğun olmayaraq, ünvanlı sosial yardımdan imtina almış 150-yə yaxın insana təkrar təyinat aparıb və hazırda onlar sosial yardım alır. Belə hallar daha çox rayonlardadır».
F.Ələkbərov bildirib ki, hazırda ünvanlı sosial yardım mexanizmi korporativ şəbəkə vasitəsi ilə idarə olunur: «Biz isə yeni məlumat idarəetmə sistemi yaradırıq. Bu sistem yaradıldıqdan sonra müxtəlif dövlət qurumları ilə birbaşa elektron formada əlaqə quracağıq, daha yazışma olmayacaq. Bizim Dövlət Sosial Müdafiə Fondunun bazasına daxilolma imkanımız, Fondla, Maliyyə, İqtisadi İnkişaf nazirlikləri, Dövlət Statistika Komitəsi ilə avtomatlaşdırılmış əlaqəmiz olacaq. Görülən işlər elektron hökumətin qurulması istiqamətində atılan addımların tərkib hissəsidir».