Sosial

Ana səhifə

Sosial

Azərbaycan paytaxtında əmək yarmarkası keçirilir

27 may 2009 10:44 (UTC +04:00)

Bakı. Aynur Vəliyeva – APA-Economics. Bu gün Bakıda Əmək və Əhalinin Sosial Müdafiəsi Nazirliyi Baş Məşğulluq İdarəsinin təşkilatçılığı ilə gənclərin işlə təminatının gücləndirilməsi məqsədilə Azərbaycan Texniki Universitetində əmək yarmarkası başlayıb.

«APA-Economics»in məlumatına görə, əmək və əhalinin sosial müdafiəsi nazirinin müavini Natiq Məmmədov bildirib ki, yarmarkada Bakı, Sumqayıt və Abşeron rayonunda fəaliyyət göstərən 150-yə yaxın idarə və müəssisə 850-yə yaxın ixtisaslaşmış iş yeri təqdim edib. Yarmarkada qeyd edilən şəhər və rayonlarda fəaliyyət göstərən iri dövlət və özəl müəssisələr, eləcə də xarici şirkətlər iştirak edir. Təqdim edilən iş yerlərinin 70%-i özəl sektora, 30%-i isə dövlət müəssisələrinə aiddir.

Qeyd edək ki, təqdim edilən vakansiyalar üzrə minimum əmək haqqı 250-300 manat, maksimum 1 400 manatdır. Yüksək əmək haqları daha çox özəl şirkətlər tərəfindən verilir.

Sumqayıt Məşğulluq Mərkəzinin direktoru Şəfa Əliyev «APA-Economics»ə bildirib ki, bugünkü yarmarkada Sumqayıt şəhəri üzrə 94 vakant iş yeri təqdim olunub. Tələbat əsasən proqramçılara, mühəndislərə, sənaye sektorunda quraşdırıcılaradır. Bununla yanaşı, yarmarkada tələbələr üçün mövsümi işlər təklif edilir.

N.Məmmədovun sözlərinə görə, 2007-ci ildən başlayaraq, Bakı, Gəncə, Mingəçevir və digər şəhər və rayonlarda «Karyerada ilk addım» şüuarı altında tədbirlər keçirilir. Nəticədə, 2007-2008-ci illər ərzində əmək yarmarkalarında iştirak edən 450 müəssisə və təşkilat tərəfindən ümumilikdə 2,5 min vakant iş yeri təqdim olunub və təxminən 800 nəfər münasib işlə təmin edilib.

İyunun 2-də daha bir əmək yarmarkasının Aqrar Universitetdə keçirilməsi planlaşdırılır.