Sosial

Ana səhifə

Sosial

Bu ilin altı ayı ərzində Azərbaycanda 220 yeni HİV-ə yoluxma faktı aşkar olunub

17 iyul 2009 12:10 (UTC +04:00)

Respublika QİÇS-lə Mübarizə Mərkəzindən APA-ya verilən məlumata görə, aparılmış epidemioloji araşdırmalar HİV/AİDS epidemiyasının, əsasən inyeksion narkotik istifadəçiləri arasında yayılmasını bir daha təsdiq edib. Belə ki, bu ilin 6 ayı ərzində HİV-ə yoluxması aşkar olunmuş 220 nəfərdən 145-də (65,9%) yoluxma inyeksion narkotik istifadəsi nəticəsində baş verib.

Bu il HİV-ə yoluxanların 213 nəfəri Azərbaycan vətəndaşı, 7-si isə əcnəbidir. Qeydiyyata alınmış 213 Azərbaycan vətəndaşından 188-i (88,3%) kişi, 25-i (11,7%) qadındır. Bu dövr ərzində AİDS mərhələsinə keçən Azərbaycan vətəndaşlarının sayı 33, AİDS-dən vəfat etmiş vətəndaşların sayı 21 nəfər olub. 213 nəfər HİV-ə yoluxmuş Azərbaycan vətəndaşından 90 nəfərinin (42,3%) ölkədən kənarda yoluxduğu müəyyənləşdirilib.

Ümumilikdə, Azərbaycanda HİV infeksiyasının ilk dəfə aşkar edildiyi 1987-ci ildən 2009-cu ilin 1 iyul tarixinədək Respublika QİÇS-lə Mübarizə Mərkəzində HİV infeksiyası təsdiq olunmuş 2034 nəfər rəsmi qeydiyyata götürülüb. Onlardan 78 nəfəri (3,8%) əcnəbi, 1956 nəfəri (96,2%) isə Azərbaycan vətəndaşıdır. HİV-ə yoluxmuş Azərbaycan vətəndaşından 1651-i (84,4%) kişi, 305-i (15,6%) qadındır. AİDS mərhələsində olan Azərbaycan vətəndaşlarının sayı 382 nəfər, AİDS-dən vəfat etmiş vətəndaşların sayı 260 nəfər olub.

Hazırda “AİDS, vərəm və malyariya ilə mübarizə üzrə” Qlobal Fondun dəstəyi ilə pulsuz qaydada Respublika QİÇS-lə Mübarizə Mərkəzində başlanılmış antiretrovirus (ARV) preparatları ilə müalicəyə 255 nəfər cəlb olunub. Onlardan 58 nəfəri müalicəyə 2009-cu ilin birinci yarısında başlayıb.

SPİD