Sosial

Ana səhifə

Sosial

“Donuz qripi” virusunun növbəti dalğası oktyabr-noyabr aylarında başlayacaq

28 iyul 2009 13:45 (UTC +04:00)

Bakı. Kəmalə Quliyeva – APA. “Respublika Taun Əleyhinə Stansiyanın eksperimental laboratoriyası A/H1N1 (“donuz qripi”) virusu ilə bağlı təhlükə yaranacağı təqdirdə, analizlərin aparılması üçün tam hazır vəziyyətdədir. Analizlər üçün laboratoriyada bütün testlər var”. Bu sözləri APA-ya açıqlamasında stansiyanın elmi işlər üzrə direktor müavini Rakif Abdullayev deyib. Onun sözlərinə görə, bu ilin aprelindən indiyə qədər laboratoriyada 476 şübhəli qrip nümunəsi analiz olunub: “Onların hamısı mənfi nəticə göstərib. 2 nəfərdə B qripinin əlamətləri aşkara çıxarılıb. Amma A tipli qriplərin heç birinin əlamətləri yoxdur”.

R. Abdullayev hesab edir ki, Azərbaycanla sərhəd olan Gürcüstan, Rusiya, Türkiyə, İran və Qazaxıstanda A/H1N1 virusu qeydə alındığından müvafiq qurumlar daha ciddi fəaliyyət göstərməlidir: “Virusun sərhədi yoxdur. Hər ehtimala qarşı biz tam hazır vəziyyətdəyik”. Sözügedən ölkələrlə mütəmadi gediş-gəliş olsa da, R. Abdullayev hələlik həmin ölkələrə getmək üçün məhdudiyyətin tətbiq olunmasına ehtiyac olmadığını deyib: “Sərhəd-keçid məntəqələrində ölkəyə gələn insanlar yoxlanılır. Hazırda Azərbaycanda virusla bağlı heç bir hal qeydə alınmadığından belə məhdudiyyət tətbiq edə bilmərik”.

Səhiyyə Nazirliyinin şöbə müdiri Viktor Qasımov isə APA-ya bildirib ki, Azərbaycanda “donuz qripi” təhlükəsi ilə bağlı böyüklər üçün Elmi Tədqiqat Ağciyər Xəstəlikləri İnstitutunda 8 boks yaradılıb. Uşaqlar üçün isə 7 saylı Uşaq Yoluxucu Xəstəxanasında bokslar ayrılıb: “Əgər xəstəlik qeydə alınarsa, ən ağır xəstələr həmin bokslara yerləşdiriləcək. Lazım gəlsə, digər klinikalar və stasionarlar da bu işə cəlb ediləcək. Bütün rayon xəstəxanalarının yoluxucu şöbələrində də bir palata hazır vəziyyətə gətirilib. Həmin müəssisələrin hamısı lazımi avadanlıqlarla, oseltamivir preparatları ilə təchiz edilib. Səhiyyə Nazirliyinin İnnovasiya və Təchizat Mərkəzində də lazımi qədər ehtiyat var”.

Ümumdünya Səhiyyə Təşkilatının (ÜST) Azərbaycan nümayəndəliyinin layihə koordinatoru Elxan Qasımov APA-ya açıqlamasında A/H1N1 virusunun çox sürətlə yayıldığını deyib: “Pandemiya olduğundan artıq hər bir hadisənin qeydə alınmasına və hər bir şübhəlinin yoxlanılmasına lüzum qalmır, buna görə də ölkələrdən gələn məlumat tam deyil. ÜST-də iyulun 22-nə olan məlumata görə, dünyada virusla bağlı 130 mindən çox hadisə qeydə alınıb. Onlardan 900 hadisə ölümlə nəticələnib. Virus inkişaf etdikcə, onun barəsində daha çox və daha dəqiq məlumatlar yaranır. Sübut olunub ki, hamilə qadınlar daha çox risk altındadır. Xüsusən də hamiləliyin son 3 ayı bu baxımdan daha təhlükəlidir. Xroniki xəstəliyi olanlar da yoluxmaya meyllidirlər. Əvvəllər virus gənclər arasında daha çox yayılırdı. İndi isə yaşlılar arasında bu tendensiya sürətlənib”.

E. Qasımovun sözlərinə görə, Azərbaycanla sərhəd olan Gürcüstanda virusla bağlı iki hadisə qeydə alınıb: “Son məlumatlara görə, İranda da virusla bağlı iki hadisə qeydə alınıb. Türkiyədə rəsmi olaraq 28 hadisə təsdiqlənmişdi. Amma indi məlumat almışıq ki, bu ölkədə qripə yoluxmada şübhəli şəxslərin sayı artıb. Yoxlamaların nəticələri ilə bağlı cavab hələ yoxdur. Rusiyada rəsmi təsdiqlənmiş 18 qrip hadisəsi qeydə alınıb. Amma bu gün məlumat almışıq ki, bu ölkədə artıq 10 yeni hadisə də təsdiq olunub. Hələlik ÜST bunu təsdiq etməyib. Qazaxıstanda virusla bağlı təsdiq olunmuş bir hadisə qeydə alınıb. Bəzi ölkələr virusun yayılmasının qarşısını almaq üçün A/H1N1 qeydə alınmış ölkələrə gediş-gəlişin məhdudlaşdırılmasını tövsiyə edirlər. ÜST isə hesab edir ki, səyahətlərin qarşısının alınması xəstəliyinin yayılmasını əngəlləməyəcək. Buna görə də səyahətlərə heç bir məhdudiyyət qoyulmur”.
ÜST təmsilçisinin sözlərinə görə, Səhiyyə Nazirliyi virusun Azərbaycanda yayılmaması ilə bağlı Dövlət Gömrük Komitəsi, “Azərbaycan Dəmir Yolu” QSC və “Azərbaycan Hava Yolları” QSC ilə birgə tədbirlər həyata keçirir: “Ölkə üzərinə nə iş düşürsə, onu görür. ÜST Azərbaycana 10 min adamın müalicəsi üçün lazım olan preparatlar verib. Əlavə yardımla bağlı isə hələlik Səhiyyə Nazirli tərəfindən bizə müraciət daxil olmayıb”.

E. Qasımovun sözlərinə görə, bu, hələlik virusun birinci dalğasıdır. Növbəti dalğanın isə oktyabr-noyabr aylarında, mövsümi qriplərin yayıldığı zaman başlanacağı gözlənilir: “Virusun özünü necə aparacağı hələ məlum deyil. Əvvəlki virusla müqayisədə A/H1N1 çox böyük sürətlə yayılır. Bu virus altı həftə ərzində elə ərazini əhatə edir ki, ondan əvvəlki virusların belə ərazini əhatə etməsi üçün 6 ay tələb olunurdu. Hələ ki, qriplə yoluxmaların böyük əksəriyyəti yüngül keçir. Virus hələlik dərman vasitələrinə qarşı həssasdır. Peyvənd istehsalı davam edir. Artıq Kanada, Avstraliya, ABŞ-da insanlar üzərində peyvəndlərin kliniki analizləri aparılır. A/H1N1 virusu ilə bağlı peyvəndin sentyabrın sonu, oktyabrın əvvəli hazır olacağı gözlənilir”.

“donuz_qripi”