Sosial

Ana səhifə

Sosial

Tələbə Qəbulu üzrə Dövlət Komissiyasının təşkil etdiyi apellyasiya komissiyalarına 100-dək müraciət daxil olub

29 iyul 2009 14:38 (UTC +04:00)

Bakı. Kəmalə Quliyeva – APA. Tələbə Qəbulu üzrə Dövlət Komissiyasının (TQDK) ali məktəblərə və orta təhsil bazasından orta ixtisas məktəblərinə keçirilən qəbul imtahanları ilə bağlı təşkil etdiyi apellyasiya komissiyalarına 100-dək müraciət daxil olub. Bu barədə APA-ya TQDK-nın mətbuat katibi Elnur Nağızadə məlumat verib. O bildirib ki, komissiyalarda həm bakalavr, həm də magistratura pilləsinə qəbulla bağlı müraciətlər araşdırılır. Müraciətlərin çoxu ixtisas seçimi ilə bağlıdır.

Qeyd edək ki, iyulun 28-dən 30-dək fəaliyyət göstərən apellyasiya komissiyaları I və IV qruplar üzrə Bakı Qızlar Universitetində, II və III qruplar üzrə Azərbaycan Dövlət Bədən Tərbiyəsi və İdman Akademiyasında, rus bölməsinin bütün ixtisas qrupları üzrə isə TQDK-da yaradılıb. Ərizə forması və cavab kartının doldurulmasında texniki səhvlərə yol verən, imtahan qaydalarının pozan abituriyentlərin müraciətinə baxılmayacaq. Ali məktəblərə qəbul yalnız imtahanda toplanmış ballara əsasən aparılır. Əhalinin heç bir sosial təbəqəsinə güzəşt nəzərdə tutulmur. Abituriyent apellyasiya komissiyasına şəxsiyyəti təsdiqləyən sənədlə şəxsən müraciət etməlidir. Müraciətin araşdırılması zamanı onunla birlikdə yalnız valideyni iştirak edə bilər, üçüncü şəxslərin iştirakına icazə verilmir.