Sosial

Ana səhifə

Sosial

Ötən il təbiəti mühafizə qanunvericiliyini pozan 885 nəfər inzibati məsuliyyətə cəlb olunub

04 fevral 2010 14:21 (UTC +04:00)

Bakı. Nicat Mustafayev – APA-Economics. Ötən il ərzində Azərbaycanın 12 rayonunun 122 kəndində 224 min nəfər əhalini təmiz içməli su ilə təmin edən modul tipli təmizləyici qurğular quraşdırılaraq istifadəyə verilib.

Dövlət Statistika Komitəsindən «APA-Economics»ə verilən məlumata görə, hesabat dövründə ekologiya sahəsində bir sıra işlər aparılıb ki, bunlardan Bakıda məişət tullantıları zavodunun tikintisinə başlanılması və yaşıllaşdırma işlərinin genişləndirilməsini qeyd etmək olar.

Bununla yanaşı, ötən ildə Ekologiya və Təbii Sərvətlər Nazirliyinin monitorinq xidmətləri tərəfindən 1302 müəssisədə müayinə aparılıb və nəticədə su hövzələrinin çirkləndirilməsi üzrə tədqiq olunmuş hər üç müəssisədən birində və atmosfer havasının çirkləndirilməsi üzrə müayinə edilmiş hər beş müəssisədən birində atılan tullantıların icazə verilən həddən artıq olması qeydə alınıb.

Ötən il təbiəti mühafizə qanunvericiliyini pozduğuna görə 885 nəfər vəzifəli şəxs və vətəndaş inzibati məsuliyyətə cəlb olunub, onlardan tutulan cərimələrin məbləği 1,4 mln. manat təşkil edib. Bundan başqa, 614 müəssisəyə qarşı iddia qaldırılıb, bu iddialara əsasən 78,1 min manat həcmində cərimə tutulub.

Qeyd edək ki, 2010-cu ilin əvvəlinə ölkədə ümumi sahəsi 218,3 min hektar olan 11 dövlət qoruğu və 295,9 min hektar olan 8 milli park mövcud olub.

Xatırladaq ki, dövlət başçısının sərəncamına əsasən 2010-cu il «Ekologiya ili» elan olunub.