Sosial

Ana səhifə

Sosial

Mingəçevir Turizm Kolleci və Rumıniyanın Andrei Barseanu Kolleci arasında müqavilə imzalanıb

11 fevral 2010 13:20 (UTC +04:00)

Mingəçevir. Şahnəzər Bəşirov - APA. Azərbaycan Mədəniyyət və Turizm Nazirliyinin Mingəçevir Turizm Kolleci ilə Rumıniyanın Andrei Barseanu Kolleci arasında əməkdaşlıq haqqında protokol imzalanıb.

APA-nın Şirvan bürosunun xəbərinə görə, Mingəçevir Turizm Kollecinin direktoru professor Əyyub Əyyubov və Mədəniyyət və Turizm Nazirliyinin elm və təhsil şöbəsinin təhsil sektorunun müdiri dosent Asif Yusubəliyev dövlətlərarası razılaşmaya əsasən Rumıniyanın Braşov şəhərinə 4 günlük səfər edib.

Azərbaycanın təhsil işçiləri şəhərin 180 illik tarixi olan Andrei Barseanu Kollecində tədrisin təşkili, maddi-texniki baza, dərsliklər, tədris planları və müəllimlərin təcrübəsi ilə tanış olublar. İki kollec arasında imzalanan protokolda milli təhsil sisteminin beynəlxalq inteqrasiya proseslərində iştirakının aktuallığı və əhəmiyyəti nəzərə alınıb. Tərəflər orta ixtisas və peşə təhsilinin təşkili, planlaşdırılması sahəsində bərabərhüquqlu və qarşılıqlı əməkdaşlıq çərçivəsində mövcud imkanlarını və maraqlarını nəzərdən keçirərək imzaladıqları protokola uyğun olaraq gələcəkdə elmi-metodiki vəsaitlərin paylanması, qarşılıqlı informasiya, konsultasiya və metodiki yardımın göstərilməsi, müştərək elmi konfrans, simpozium, seminar və dəyirmi masaların keçirilməsi ilə təcrübə mübadiləsinə təkan verilməsi, tələbələrin peşə bacarıqlarının artırılmasına xidmət edən birgə təlim kurslarının təşkil olunması, konkret problem üzrə müştərək beynəlxalq elmi tədqiqatların aparılması, beynəlxalq layihə və proqramlar çərçivəsində əməkdaşlıq edilməsi, qabaqcıl müəllimlərin təcrübə mübadiləsinin təşkili istiqamətində birgə əməkdaşlıq edəcəklər.

Qeyd edək ki, Mingəçevir Turizm Kolleci artıq üç ildir Şotlandiyanın Stevenson Kolleci ilə əməkdaşlıq edir. Fevralın 28-də Stevenson Kollecinin nümayəndələri Mingəçevirə beş günlük səfərə gələcəklər. Mingəçevir Turizm Kolleci Türkiyə, Avstriya, Rusiya və Ukraynanın turizm sahəsi üzrə tanınmış təhsil ocaqları ilə də təcrübə mübadiləsi aparır.