Sosial

Ana səhifə

Sosial

Qarabağ müharibəsi veteranları arasında Xocalı soyqırımının ildönümünə həsr olunmuş güllə atıcılığı yarışı keçirilib

24 fevral 2010 13:49 (UTC +04:00)

Bakı. Rəşad Süleymanov-APA. Azərbaycan Könüllü Hərbi Vətənpərvərlik Texniki İdman Cəmiyyəti Respublika Şurası (KHVTİC) Qarabağ müharibəsi veteranları arasında Xocalı faciəsinin 18-ci ildönümünə həsr olunmuş güllə atıcılığı üzrə yarış keçirib. Bu barədə APA-ya KHVTİC-in mətbuat xidmətindən məlumat verilib.

Cəmiyyətin 1 saylı Bakı Birləşmiş Texniki Məktəbində keçirilən Azərbaycan Vətən Müharibəsi Veteranları Birliyi (AVMVB) ilə birgə keçirilən tədbirdə Bakı və Smqayıtda yaşayan 40-a yaxın Qarabağ müharibəsi veteranı iştirak edib. Məktəbin müdavimlərinin də izlədiyi tədbirin açılışında çıxış edən KHVTİC-in sədri polkovnik Novruzəli Orucov rəhbərlik etdiyi təşkilatın hər il cəmiyyətin müxtəlif təbəqələrindən olan insanlar arasında anoloji yarışlar təşkil etdiyini vurğulayıb. O, müharibədə iştirak etmiş şəxslər arasında təşkil olunan bu yarışın isə gələcəyin hərbçiləri üçün böyük təsirə malik olduğunu qeyd edib.

AVMVB sədri Füzuli Rzaquliyev isə veteranların Azərbaycan torpaqlarının düşməndən azad edilməsi üçün döyüşlərə hazır olduqlarını vurğulayıb. F. Rzaquliyev döyüş yolu keçmiş minlərlə keçmiş Qarabağ döyüşçüsünün Ali Baş Komandanın döyüş əmrini gözlədiyini qeyd edib.

Daha sonra veteranlar tüfəngdən müxtəlif hədəflərə atəş açıb. Qalib gələn veteranlara diplom və medallar verilib.

Tədbir çərçivəsində məktəbdə ermənilərin azərbaycanlılara qarşı Qarabağda törətdiyi soyqırımı özündə əks etdirən fotolardan ibarət sərgi təşkil olunub.