Sosial

Ana səhifə

Sosial

Azərbaycan hökuməti əcnəbilərin viza üçün birbaşa Xarici İşlər Nazirliyinə müraciət etdiyi halların müəyyən edilməsi barədə qərar qəbul edib

25 fevral 2010 13:10 (UTC +04:00)

Bakı. Nicat Mustafayev – APA-Economics. Azərbaycan Nazirlər Kabineti viza alınması üçün əcnəbilərin və vətəndaşlığı olmayan şəxslərin ərizə ilə birbaşa Xarici İşlər Nazirliyinə (XİN) müraciət etdiyi halların müəyyən edilməsi barədə qərar qəbul edib.
Nazirlər Kabinetindən «APA-Economics»ə verilən məlumata görə, qərara əsasən, viza alınması üçün əcnəbilərin və vətəndaşlığı olmayan şəxslərin gəlişin məqsəd və müddətini göstərməklə, ərizə ilə birbaşa XİN-ə müraciət etdiyi hallar Azərbaycanın ali dövlət hakimiyyəti orqanlarının və yuxarı dövlət orqanının dəvəti ilə və ya dövlət tərəfindən təşkil edilən beynəlxalq tədbirlərdə iştirak etmək məqsədi ilə ölkəyə rəsmi nümayəndə heyətinin tərkibində, xarici ölkələrin Azərbaycanda fəaliyyət göstərən diplomatik nümayəndəlik və konsulluqlarının, habelə beynəlxalq təşkilatların nümayəndəliklərinin əməkdaşları, inzibati-texniki xidmət heyətinə daxil olan şəxslər və onların ailə üzvləri, həmçinin əcnəbilər xüsusi diplomatik missiya ilə, fövqəladə halların nəticələrinin aradan qaldırılmasında iştirak etmək məqsədi ilə Azərbaycan Fövqəladə Hallar Nazirliyinin rəsmi təqdimatı əsasında, özünün təcili müalicəsi, yaxud Azərbaycanda yaşayan yaxın qohumunun ağır xəstəliyi və ya vəfatı ilə əlaqədar bunu təsdiq edən sənəd əsasında, ərazisində Azərbaycanın diplomatik nümayəndəlikləri və konsulluqları olmayan xarici ölkələrdən XİN tərəfindən təsdiq edilmiş dəvət əsasında, həmçinin Azərbaycanın tərəfdar çıxdığı beynəlxalq müqavilələrdə nəzərdə tutulmuş hallarda və həmin müqavilələrdən irəli gələn öhdəliklərin həyata keçirilməsini təmin etmək məqsədi ilə viza verilməsi nəzərdə tutulduğu halda müvafiq təqdimat əsasında Azərbaycana gəldikdə müəyyən edilib.
Qeyd edək ki, qərar 2010-cu il aprelin 1-dən qüvvəyə minir.