Sosial

Ana səhifə

Sosial

Söz Azadlığını Müdafiə Fondu dövlət dilinin qorunması ilə bağlı monitorinqlərə başlayıb

03 mart 2010 09:07 (UTC +04:00)

Bakı. Elbrus Seyfullayev - APA. Söz Azadlığını Müdafiə Fondu (SAMF) reklamlarda, xidmət obyektlərində və media qurumlarında dövlət dilinin qorunması ilə bağlı monitorinqlərə başlayıb. Təşkilatdan APA-ya daxil olan məlumata görə, ilk olaraq reklam lövhələrinin yazılışı zamanı “Dövlət dili haqqında” qanunun tələblərinə necə əməl edildiyini aydınlaşdırmaq istiqamətində monitorinqlər aparılıb. İlk monitorinq Bakı şəhərinin 10 mərkəzi küçə və prospektində mövcud olan 442 xidmət sahəsindəki reklam xarakterli lövhələri əhatə edib.

Araşdırmalar nəticəsində bəlli olub ki, reklamların dili, konkret olaraq reklamlar hazırlanarkən dövlət dilinin tələblərinin qorunması bir neçə il öncəki vəziyyətlə müqayisədə nisbətən yaxşılaşsa da, hələ də qənaətbəxş deyil. Belə ki, reklam xarakterli lövhələrin 52%-də Azərbaycan dili, 37%-də ingilis dili, 11%-də isə Türkiyə türkcəsində olan sözlərdən istifadə olunub. Bununla yanaşı, müşahidə aparılan lövhələrin yazılışının 23%-də qrammatik səhvlərə rast gəlinib. Lövhələrin 18%-də isə rus mənşəli sözlərin latın qrafikası ilə verildiyi aşkarlanıb. Azadlıq prospekti boyu sıralanan “Boçka”, “Başmaçok”, “Çudo Peçka”, İstiqlaliyyət küçəsində “Tetradka”, R. Behbudov küçəsində “Bon Apetit” şirniyyat mağazası, S. Vurğun küçəsində “Merkez Lahmacun”, “İnce Göl” və s. bu tipli adlar Azərbaycan dilində heç bir qarşılığı olmadan paytaxtın küçələrini “bəzəyir”. Bir çox qadın salonlarının üzərində yalnız ingilis dilində “Beaty salon” ifadələri həkk olunub.

Söz Azadlığını Müdafiə Fondu Azərbaycan dilinin müxtəlif səviyyələrdə qorunmasına həsr olunan monitorinqləri bundan sonra da davam etdirəcək. Fond yaxın vaxtlarda media qurumlarında ziyalıların, mütəxəssislərin, əlaqədar dövlət qurumları təmsilçilərinin, dilçi alimlərin iştirakı ilə geniş müzakirələrə başlayacaq.