Sosial

Ana səhifə

Sosial

Yardımlıdakı torpaq sürüşməsi zonasından bir ailə evakuasiya olunub

04 mart 2010 14:54 (UTC +04:00)

Yardımlı. Ağəddin Babayev – APA. Azərbaycanın Yardımlı rayonunun Telavar kəndi ərazisində torpaq sürüşməsi nəticəsində ciddi problemlər yaranıb.
APA-nın cənub bürosunun məlumatına görə, yerli sakinlər sürüşmənin bu ilin fevral ayından müşahidə edilməyə başlandığını bildiriblər. Son günlərdə isə proses daha da intensivləşib. Ən gərgin vəziyyət kənd sakini Xanhüseyn Rzayevin həyətyanı sahəsində müşahidə edilir. 2 hektara yaxın sahəni əhatə edən sürüşmə zamanı təxminən 1 metr dərinliyində yarğan əmələ gəlib. Bu günə kimi torpaq sahəsi təxminən 3 metr irəli sürüşərək kənd sakini Xanhüseyn Rzayev və onunla qonşuluqda yaşayan Muğbil Əbişovun yaşadığı fərdi evlər üçün təhlükə yaradıb. Hər iki evin divarlarında ciddi çatlar əmələ gəlib.
Hadisə ilə bağlı Fövqəladə Hallar Nazirliyinin mütəxəssisləri kəndə gəlib və sürüşmə ərazisinə baxış keçiriblər. Faktla bağlı müvafiq sənədləşmə işləri aparan nazirlik əməkdaşları bildiriblər ki, əgər qarşıdakı aylarda yağıntılar intensivləşərsə, ərazidə torpaq sürüşməsi daha təhlükəli vəziyyət yarada bilər.
Kəndin digər bir hissəsində isə Adışirin Sariyevə məxsus həyətyanı sahədə 2 sot torpaq sahəsi sürüşüb. Lakin sürüşmə zamanı yaşayış evləri üçün heç bir təhlükə yaranmayıb. Bununla belə, sakinlərinin qənaətincə , qarşıdakı günlərdə yağıntılar intensivləşərsə, kənddə daha 10 ev üçün təhlükə yarana bilər. Ümumiyyətlə isə, kənd sürüşmə zonasına aid olduğundan ərazidə ara-sıra belə torpaq sürüşmələri baş verir. Kənddə ilk torpaq sürüşməsi isə 1954-cü ildə qeydə alınıb. Həmin vaxtdan kəndin ayrı-ayrı ərazilərində yarğanlar əmələ gəlib.

Yardımlı Rayon İcra Hakimiyyəti başçısının birinci müavini, rayon Fövqəladə Hallar Komissiyasının sədri Etibar Fərruxovun APA-nın yerli bürosuna verdiyi məlumata görə, qabaqlayıcı tədbiri kimi kənd sakini Xanhüseyn Rzayevin ailəsi bu gün müvəqqəti olaraq kənddəki inzibati binaya köçürülüb.