Sosial

Ana səhifə

Sosial

Azərbaycan Qızıl Aypara Cəmiyyətinin 90 illik yubileyi qeyd olunub

10 mart 2010 10:38 (UTC +04:00)

Bakı. Laçın Sultanova-APA. Azərbaycan Qızıl Aypara Cəmiyyətinin (QAC) 90 illiyi qeyd olunub. APA-nın məlumatına görə, cəmiyyətin sədri Novruz Aslan qurumun yaranması, inkişafı və bugünkü fəaliyyəti barədə məlumat verib. O deyib ki, cəmiyyət 1920-ci ildə general-leytenant Əliağa Şixlinskinin təşəbbüsü və Fətəli Xan Xoyskinin dəstəyi ilə yaradılıb. O cəmiyyətin SSRİ dövrində 70 il ərzində müxtəlif adlarda fəaliyyət göstərdiyini, həmin dövrdə böyük nailiyyətlər əldə etdiyini xatırladıb: “Azərbaycan Qızıl Aypara Cəmiyyəti 1995-ci ildə Beynəlxalq Qızıl Xaç Komitəsi tərəfindən rəsmən tanınıb, elə həmin ildən Beynəlxalq Qızıl Xaç və Qızıl Aypara Cəmiyyətləri Federasiyasının daimi, bərabərhüquqlu üzvü qəbul edilib”.

N. Aslan bildirib ki, hazırda cəmiyyətin 270 min üzvü, 18 min könüllüsü var.

Prezident Administrasiyası ictimai-siyasi şöbəsinin müdiri Əli Həsənov QAC-ın Azərbaycanın sosial həyatında mühüm rol oynadığını deyib. “Bu qurumun fəaliyyəti cəmiyyətin ehtiyacından yaranır” deyən şöbə müdiri, keçən əsrin 90-cı illərində Dağlıq Qarabağ münaqişəsi ilə bağlı yaranmış vəziyyətlə əlaqədar cəmiyyətin gördüyü işlərdən danışıb. Əli Həsənov prezident İlham Əliyevin fərmanı cəmiyyətin təltif olunmuş 16 əməkdaşına «Tərəqqi» medallarını təqdim edib.

Azərbaycan Milli Məclisinin vitse-spikeri Bahar Muradova deyib ki, QAC çətin anlarda kimsəsizlərə təmənnasız dayaq olub. B. Muradova cəmiyyətə Azərbaycan, humanist ideyalar naminə, insanlara mərhəmət, qayğı, diqqət göstərmək işinə sadiq qalmağı arzu edib. O, spiker Oqtay Əsədovun təbrikini və Milli Məclis adından hədiyyəni Novruz Aslana təqdim edib.