Sosial

Ana səhifə

Sosial

Bu ilin birinci rübündə Azərbaycanda 5266 nəfər işsiz vətəndaş işlə təmin olunub

15 aprel 2010 09:29 (UTC +04:00)

Bakı. Aynur Vəliyeva - APA-Economics. Azərbaycanda bu ilin birinci rübü ərzində Dövlət Məşğulluq Xidməti tərəfindən 5266 nəfər işsiz və iş axtaran vətəndaş münasib işlə təmin olunub.

“APA-Economics”in məlumatına görə, bunu əmək və əhalinin sosial müdafiəsi naziri Füzuli Ələkbərov Nazirlər Kabinetinin 2010-cu ilin I rübünün yekunlarına həsr olunmuş iclasında çıxış edərkən bildirib.

Nazir qeyd edib ki, 1460 nəfər vətəndaş müasir əmək bazarının tələblərinə uyğun peşələr üzrə hazırlıq kurslarına cəlb edilib ki, bu da ötən ilin müvafiq dövrünə nisbətən təxminən 2 dəfə çoxdur: “Növbəti aydan ölkənin əksər şəhər və rayonlarında əmək yarmarkalarının təşkilinə start veriləcək. Ötən il 57 şəhər və rayonda keçirilmiş bu tədbirlər vasitəsilə 8132 nəfər işə düzəlib. Ümumilikdə, ötən il ərzində Dövlət Məşğulluq Xidməti orqanları tərəfindən 28 min 382 nəfər işlə təmin olunub”.

F.Ələkbərov bildirib ki, prezidentin sərəncamına əsasən “Əmək miqrasiyası kvotasının müəyyən edilməsi Qaydası” hazırlanaraq Nazirlər Kabineti tərəfindən təsdiq edilib və bu il üçün kvota cəmi 10 700 nəfər təşkil edir: “Hazırda ölkədə müvafiq fərdi icazə əsasında 82 ölkədən 6386 nəfər əmək fəaliyyəti ilə məşğul olur ki, bu da ötən ilin müvafiq dövrü ilə müqayisədə 602 nəfər və ya 1,4 dəfə çoxdur. Əcnəbilərə fərdi icazələrin alınması üçün dövlət rüsumu məbləğinin 45 manatdan 1000 manata qaldırılması daxili əmək bazarının qorunması ilə yanaşı, həm də işəgötürənlər tərəfindən ölkəmizə əsasən yüksək ixtisaslı kadrların gətirilməsinə, həmçinin yerli mütəxəssislərin peşə və ixtisaslarının artırılmasına daha artıq dərəcədə diqqət göstərmələrinə xidmət edib”.

Nazirin sözlərinə görə, ötən il ərzində Dövlət Əmək Müfəttişliyi tərəfindən 2438 müəssisədə həyata keçirilən dövlət nəzarəti nəticəsində 9124 halda əmək qanunvericiliyinin tələblərinin pozulduğu aşkar edilib, 553 870 manat məbləğində cərimə tətbiq edilib, 7048 nəfər işçi ilə əmək müqaviləsi bağlatdırılıb, vətəndaşlara ödənilməsi təmin edilən gecikdirilmiş vəsaitin ümumi məbləği 1 045 564 manat olub. Bu ilin birinci rübü ərzində isə işə qeyri-leqal cəlb edilən 431 nəfərlə əmək müqaviləsi bağlatdırılıb, vətəndaşlara ödənilməsi təmin edilmiş gecikdirilmiş vəsaitin ümumi məbləği 200 139 manat olub.