Sosial

Ana səhifə

Sosial

Bərdə Qeydiyyat Şöbəsinin rəisi: “15 yaşındakı qızını ərə verən ata-analara qarşı sərt ölçü götürülməlidir”

16 aprel 2010 10:01 (UTC +04:00)

Bərdə. Teymur Zahidoğlu - APA. Bərdədə erkən nikahlar və onun fəsadlarına həsr olunmuş tədbir keçirilib. Tədbirdə iştirak edən Bərdə Qeydiyyat Şöbəsinin rəisi Səmayə Mehdiyeva APA-nın Qarabağ bürosuna açıqlamasında deyib ki, yeni ailə quranların əksəriyyətinin nikah və onun əhəmiyyəti haqqında anlayışları yoxdur: “Bəzən nikaha daxil olanlar arasındakı yaş fərqi təəssüf doğuracaq qədər böyük olur. Mən belə düşünürəm ki, qızlar ən azı 20 yaşından sonra ailə münasibətlərini mənimsəmək qabiliyyətinə malik olurlar. Onların nəinki 15-16, hətta 19 yaşında ailə qurması uzun müddət həmin qızların depressiya içərisində yaşamasına gətirib çıxarır”.

S. Şirinova bildirib ki, son illər baş verən boşanma hallarının əksəriyyəti ailədə kişi ilə qadın arasında yaranan anlaşılmazlıqdan irəli gəlir: “38 yaşlı kişinin 16 yaşlı qızla nikaha girməsi heç cür qəbul oluna bilməz. Amma son illərin statistikası göstərir ki, bu yaş qrupları arasında bağlanan nikah əqdlərinin sayı azalmaq əvəzinə, daha da çoxalır”.

Zorən evliliklərin, valideynlərin iradəsinə uyğun olaraq qurulan ailələr barədə sualı cavablandıran S. Mehdiyeva qeyd edib ki, ailə-nikah məsələlərində ən çətin problem məhz budur: “Bizim qanunvericiliyə əsasən 16 yaşı tamam olmamış qızların nikaha daxil olması yalnız valideynlərin və ya qızın müraciətindən sonra müvafiq yerli icra hakimiyyəti orqanının arayışı, rəsmi icazəsi əsasında mümkündür. Amma elə hallar var ki, 15 yaşında qızlar nikahdankənar evliliyə daxil olur. Rəsmi nikah bağlamağa gələndə isə onların iki, yaxud üç övladı olmuş olur. Bu cür ailələr iki-üç ildən sonra dağılmağa başlayır. Bu məsələni də mütləq qanunla tənzimləmək lazımdır. 15 yaşındakı qızını ərə verən ata-analara qarşı sərt ölçü götürülməlidir. Onlar bu əmələ görə məsuliyyətə cəlb olunmalıdır. Çünki bu cür nikahlar gənclərin həyatını, gələcəyini, sağlamlığını ciddi təhlükə altına alır”.

Evlilikdən əvvəl sevgili, yaxud nişanlı oğlan və qızlar arasındakı münasibətlərə toxunan S. Mehdiyevanın sözlərinə görə, Avropada olduğu kimi, tərəflərin bir-birini tanıması üçün müəyyən müddət bir yerdə yaşaması bizdə qəbulolunmaz haldır: “Amma heç olmasa onlara kinoya, teatra, parka çıxıb bir-birlərini tanımaq imkanı verilməlidir. Amma təəssüf ki, bizim mentalitetimiz bir çox məqamın üstündən xətt çəkir. İndi daha çox internetlə, mobil telefonla, SMS-lə tanış olurlar. Bu isə həmişə yaxşı nəticələr vermir”.

Erkən_nikah