Sosial

Ana səhifə

Sosial

Azərbaycan Dillər Universitetində III Respublika elmi konfransı başa çatıb

17 aprel 2010 12:53 (UTC +04:00)

Bakı – APA. Aprelin 17-də Azərbaycan Dillər Universitetində (ADU) ali məktəbə universitet statusu verilməsinin 10 illiyinə həsr olunmuş “Xarici dillərin tədrisinin aktual problemləri” mövzusunda üçgünlük Respublika elmi konfransı öz işini başa çatdırıb.

ADU-nun mətbuat xidmətindən APA-ya verilən məlumata görə, konfransın bağlanış mərasimini giriş sözü ilə açan ADU-nun elmi işlər üzrə prorektoru, professor Dünyamin Yunusov III Respublika elmi konfransının uğurla sonuclandığını deyib və buna görə də ADU-nun rektoru Səməd Seyidova minnətdarlığını bildirib.

Konfransın müsbət tərəflərinin çox olduğunu bildirən prorektor konfrans çərçivəsində keçirilən bölmələrdə məruzələrin məzmunlu və əhatəli olduğunu qeyd edib, gələcəkdə də bu cür konfransların mütəmadi keçirilməsinin vacibliyindən danışıb. Konfrans çərçivəsində keçirilən bölmələrin rəhbərləri öz mülahizə və təkliflərini bildirdikdən sonra III Respublika elmi konfransının Yekun sənədi qəbul edilib.

Xatırladaq ki, III Respublika elmi konfransında “Xarici dillərin tədrisində müasir texnologiyalardan istifadə”, “Xarici dillərin tədrisinin nəzəri və praktik məsələləri”, “Kommunikativ dilçilik”, “Xarici dillərin mədəniyyətlərarası kommunikasiyada rolu”, “Xarici ölkə ədəbiyyatının tədrisi problemləri” bölmələrində müzakirələr aparılıb və ümumilikdə 181 məruzə dinlənilib.