Sosial

Ana səhifə

Sosial

Bakıda və Masallıda Çernobıl qəzasının ildönümü qeyd olunub

26 aprel 2010 14:06 (UTC +04:00)

Bakı, Masallı. Elnur Məmmədli, Ağəddin Babayev – APA. Çernobıl qəzasının ildönümü ilə bağlı Səbail rayon İcra Hakimiyyətində qəzanın aradan qaldırılmasının iştirakçıları olmuş rayon sakinləri ilə görüş keçirilib. İcra Hakimiyyətinin mətbuat xidmətindən APA-ya daxil olan məlumata görə, görüşdə çıxış edən İcra Hakimiyyətinin başçısı Asif Əsgərov bu hadisə zamanı əlil olmuş vətəndaşların sosial müdafiəsi ilə bağlı sərəncamlar imzalandığını, Çernobıl əlillərinə diqqət və qayğı göstərildiyini deyib. İcra başçısı Səbail rayonunda Çernobıl qəzasının aradan qaldırılmasına iştirak etmiş 90 nəfərin 52-nin müxtəlif dərəcəli əlil olduğunu, onlara dövlət tərəfindən müəyyən təqaüdlərin verildiyini qeyd edib.

Tədbirin sonunda Çernobıl əlillərinə maddi yardım və ərzaq bağlamaları təqdim olunub.

Bu gün Masallı rayonunda da Çernobıl qəzasının 24-cü ildönümü ilə əlaqədar tədbir keçirilib. APA-nın cənub bürosunun məlumatına görə, tədbiri giriş sözü ilə açan Masallı rayon İcra Hakimiyyəti (RİH) başçısı aparatının ictimai təşkilatlar və siyasi partiyalarla iş şöbəsinin müdiri Seyfəddin Əliyev 1986-cı il aprelin 26-da baş verən Çernobıl qəzasının nəticələrinin aradan qaldırılmasında iştirak edən azərbaycanlıların demək olar ki, hamısının ömürlük şikəstlik qazandıqlarını vurğulayıb. Masallıdakı 32 və 36 binalarda 6 Çernobıl əlilinin yeni mənzillərlə təmin edildiyini qeyd edən RİH nümayəndəsi yaxın gələcəkdə daha 3 Çernobıl əlilinə də yeni mənzillərin veriləcəyini diqqətə çatdırıb.
Tədbirin sonunda Çernobıl əlillərinə RİH tərəfindən pul yardımları verilib.
Tədbirdən sonra isə I qrup Çernobıl əlili, yataq xəstəsi Möləddin Ələm oğlu Ələmovun evinə baş çəkilib və ona ərzaq və pul yardımı olunub.

Qeyd edək ki, Çernobıl qəzası nəticəsində 7 min insan həlak olub, 25 min insan güclü radiasiyaya məruz qalaraq ömürlük şikəst olub.