Sosial

Ana səhifə

Sosial

Bakıda bədbəxt hadisələrdən sığortalanma mövzusunda texniki seminar keçirilir

28 aprel 2010 10:40 (UTC +04:00)

Bakı. Elnur Hüseynquluyev - APA-Economics. Bu gün Bakıda Azərbaycan Dövlət Sosial Müdafiə Fondu (DSMF) və Beynəlxalq Sosial Təminat Assosiasiyasının təşəbbüsü ilə «Bədbəxt hadisələrdən sığortalanma: inkişaf tarixi, islahatlar, mövcud problemlər» mövzusunda iki günlük texniki seminar başlayıb.

«APA-Economics»in məlumatına görə, tədbirdə DSMF sədri Səlim Müslümov Azərbaycanda son illər ərzində sosial sığorta sahəsində aparılan islahatlardan və əldə olunan nailiyyətlərdən danışıb.

S.Müslümov bildirib ki, Azərbaycanda sosial sığortanın əsas iki növü - «Tibbi sığorta» və «İstehsalatda bədbəxt hadisələrdən və peşə xəstəliklərindən sığortası» növləri inkişaf etdirilmədir. Artıq «İstehsalatda bədbəxt hadisələrdən və peşə xəstəliklərindən sığorta» haqqında qanun layihəsi Milli Məclisin üçüncü oxunuşuna təqdim olunub. Layihə təsdiq olunduqdan sonra qaydalar həmin siyasət üzrə həyata keçiriləcək.

S.Müslümov həmçinin qeyd edib ki, bu, Azərbaycanda yeni bir sahə olduğu üçün hələ ötən ilin oktyabr ayında Almaniyanın Beynəlxalq Sosial Təminat Assosiasiyasının rəhbəri Azərbaycanda müvafiq nazirliklərdə görüşlər keçirib. Azərbaycanda «İstehsalatda bədbəxt hadisələrdən və peşə xəstəliklərindən sığorta» haqqında qanun layihəsi müzakirəsi aparıldığı bir vaxtda, həmçinin bu sahənin inkişafı üçün Bakıda belə bir texniki seminarın keçirilməsinə şərait yaradılıb.

Milli Məclisin Sosial siyasət komitəsinin sədri Hadı Rəcəbli bildirib ki, Azərbaycanda bu sahədə aparılan islahatlar öz nəticəsini verib. O, «İstehsalatda bədbəxt hadisələrdən və peşə xəstəliklərindən sığorta haqqında» qanun layihəsində 40%-dək dəyişikliklərin edildiyini bildirib.

Əmək və əhalinin sosial müdafiəsi nazirinin müavini Natiq Məmmədov deyib ki, «İstehsalatda bədbəxt hadisələrdən və peşə xəstəliklərindən sığorta haqqında» qanun layihəsi təsdiq olunarsa, bu, Azərbaycanda əməyin mühafizəsi sisteminə təkan verəcək.

N.Məmmədov son 3 il ərzində fiziki şəxslərlə bağlanan əmək müqavilələrinin sayının 45 146-ya çatdığını bildirib. O, həmçinin bu dövr ərzində istehsalatda bədbəxt hadisələrin sayının 1,8 dəfə azaldığını qeyd edib.

Qeyd edək ki, seminar öz işini sabah yekunlaşdıracaq.