Sosial

Ana səhifə

Sosial

Azərbaycan Dövlət Neft Şirkəti mənzil növbəsi üzrə ailə başçısı şəhid olmuş işçilərin yeni mənzillə təmin edilməsini başa çatdırıb

30 aprel 2010 07:04 (UTC +04:00)

Bakı. Rəşad Süleymanov – APA-Economics. Cari ilin əvvəlindən Azərbaycan Dövlət Neft Şirkətində (ARDNŞ) mənzil növbəsində olan 58 işçi yeni mənzillə təmin edilib, ilin sonunadək mənzil növbəsində olan daha 150 ailənin təmin edilməsi nəzərdə tutulur. Bu barədə «APA-Economics»ə ARDNŞ-dən məlumat verilib.

Bu günlərdə Şirkətin mənzil növbəsində olan və ailə başçısı şəhid olmuş sonuncu ailəyə də mənzil verilib. Belə ki, 1993-cü ildə Azərbaycanın ərazi bütövlüyü uğrunda gedən döyüşlərdə şəhid olmuş Zahid Məmmədovun həyat yoldaşı Pərzad Baxşəliyeva və 2 övladı 2 otaqlı mənzillə təmin edilib. Qeyd edək ki, P.Baxşəliyeva ARDNŞ-nin nəzdində fəaliyyət göstərən Mərkəzi Neftçilər Xəstəxanasında həkim-terapevtdir. Bununla da Şirkətin mənzil növbəsi üzrə ailə başçısı şəhid olmuş işçilərin yeni mənzillə təmin edilməsi prosesi başa çatıb.

Xatırladaq ki, ARDNŞ və Neft və Qaz Sənayesi İşçilərinin Həmkarlar İttifaqı Respublika Komitəsinin 1 iyun 2009-cu il tarixli birgə əmr-qərarı ilə ARDNŞ üzrə mənzil növbəsi mərkəzləşdirilib. Artıq «Neftçi» Mənzil Tikinti Kooperativinin fəaliyyətə başlaması üçün Bakı şəhərinin Qaradağ, Xətai, Səbail, Əzizbəyov və Sabunçu rayonları ərazisində torpaq sahələri ayrılıb. Yaxın vaxtlarda həmin sahələrdə yaşayış binalarının inşasına başlanacaq. Bununla yanaşı mənzil növbəsində olan işçilərə öz istəklərinə uyğun olaraq fərdi yaşayış evlərinin tikilməsi məqsədilə Şirkət tərəfindən kommunal infrastrukturla təchiz edildikdən sonra müvafiq torpaq sahələrinin ayrılması nəzərdə tutulur. Hazırda ARDNŞ üzrə mərkəzləşdirilmiş mənzil uçotunda 6 600-ə yaxın ailə qeydiyyatdadır. Onlardan 8%-i ölkənin müxtəlif rayonları üzrə, digərləri isə Bakı şəhəri üzrə mənzil növbəsinə dayanıb.