Sosial

Ana səhifə

Sosial

Tiflisdə «ERASMUS MUNDUS» layihəsinin təqdimatı keçirilib

18 sentyabr 2010 15:07 (UTC +04:00)

Tiflis. Nizami Məmmədzadə - APA. Bu gün Tiflis Dövlət Universitetinin (TDU) təşəbbüsü ilə «ERASMUS MUNDUS - Action 2: Partnership for Georgia, Armenia and Azerbaijan» layihəsinin təqdimatının rəsmi açılışı olub. APA-nın Gürcüstan bürosunun məlumatına görə, tədbirdə TDU-nun rektoru Aleksandr Kvitaşvili, Avropa İttifaqının Gürcüstan nümayəndəliyinin rəhbəri Per Eklund, TDU-nun xarici əlaqələr departamentinin sədri Tea Kerkedava, «ERASMUS MUNDUS» proqramının əlaqələndiricisi Lia Qlonti və başqaları çıxış ediblər.

Tədbirdə Avropa İttifaqının tərəfdaşlığı layihəsi çərçivəsində diplomatik korpus nümayəndələri və yüksək vəzifəli qonaqlar iştirak ediblər. Mərasimə konsorsium üzvləri - Cənubi Qafqazdan 12 universitet və 7 Avropa universitetinin təmsilçiləri qatılıb.
«ERASMUS MUNDUS» proqramında Gürcüstandan 3 universitet - TDU, Batumi Dövlət Universiteti və Telavidəki Y.Qoqebaşvili Universiteti, Azərbaycandan - Azərbaycan Turizm İnstitutu, Gəncə Dövlət Universiteti və Xəzər Universitetinin nümayəndələri qatılıb. Tədbirdə eyni zamanda Ermənistan universitetlərinin nümayəndələri də iştirak ediblər.

TDU-nun rektoru Aleksandr Kvitaşvili APA-ya açıqlamasında bildirib ki, «ERASMUS MUNDUS» Avropa təhsil sistemi istiqamətində ali təhsil sahəsində mobil əməkdaşlıq proqramının yaxşılaşdırılmasına yönəldilən bir proqramdır. Burada Cənubi Qafqazın üç ölkəsi və Avropadan bir sıra ölkələr iştirak edir. Proqram 2007-ci ildən fəaliyyət göstərir və bu, artıq ikinci mərhələdir. Proqram çərçivəsində TDU-da dərslərin mobilləşdirilməsi məqsədilə 58 gürcü tələbə, tədiqaqatçı və universitet əməkdaşları tərəfdaş universitetlərdə təhsil almaq və işləmək üçün göndəriləcək. Ümumiyyətlə, «ERASMUS MUNDUS» layihəsi çərçivəsində Cənubi Qafqazdan olan elm adamları Avropa təhsil ocaqlarının diplomlarına sahib ola bilərlər.

Azərbaycan Turizm Universitetinin beynəlxalq əlaqələr üzrə layihələr şöbəsinin müdiri, Avropa İttfiaqının «Tempus» ofisinin Azərbaycan tərəfinin ali təhsil üzrə eksperti və proqramın meneceri Nigar Abbaszadə APA-ya bildirib ki, Azərbaycandan hər il 33 tələbə xaricə göndəriləcək: «Bu layihə çərçivəsində biz Portuqaliya, Fransa və İtaliyadan 3 tələbə və 3 müəllim qəbul etmişik. Amma layihənin strukturuna görə, Cənubi Qafqazdan daha çox tələbə Avropa İttifaqının xətti ilə xaricdə oxumağa göndərilir. Bu təhsil artıq 5-ci ildir ki, fəaliyyətdədir. Bu proqrama əsasən 195 tələbə Azərbaycan Turizm İnstitutunu bitirib və indi onlar əmək bazarında uğurla çalışır».