Sosial

Ana səhifə

Sosial

Beynəlxalq Universitetin məzunlarından bir qrupu mətbuat konfransı keçirib

21 sentyabr 2010 11:45 (UTC +04:00)

Bakı. Şəhriyar Əlizadə - APA. Bu gün Azərbaycan Beynəlxalq Universitetinin məzunlarından bir qrupu mətbuat konfransı keçirib. APA-nın xəbərinə görə, tədbiri giriş sözü ilə açan universitetin tarix-ictimaiyyət fakültəsinin məzunu Elvin Dadaşov ali məktəbdə qanunsuzluqların olduğunu deyib: “Mən və buradakı digər qrup yoldaşlarım Rusiya Federasiyasının Dağıstan Universitetinə qanuni yolla qəbul olunmuşuq. Sonra isə Azərbaycan Beynəlxalq Universitetinə köçürülmüşük. Hər bir sənədimizin olmasına baxmayaraq Təhsil Nazirliyi bizi qəbul etmir. Həmin sənədlər tam qanunidir. Lakin nazirlik həmin sənədləri qanunsuz adlandırır. Biz hər il 700 manat təhsil haqqı ödəmişik. Hansı ki, həmin təhsil haqqı Dağıstan Universitetində 300 manatdır. Həmçinin bizi yataqxana və gündə 3 dəfə yeməklə də təmin edirdilər. Əgər bizim şikayətimizə baxmasalar, biz aclıq aksiya keçirəcəyik, həmçinin Avropa Məhkəməsinə müraciət edəcəyik. Elşad Abdullayevin tutulması bizə heç nə vermir”.

Tədbirdə iştirak edən vəkil Aslan İsmayılov isə Beynəlxalq Universitetinin hər zaman qanunsuzluqla məşğul olduğunu və bunu hər kəsin bildiyini deyib: “Elşad Abdullayev dələduzdur. Həmin universitet San-Marino olanda da, Beynəlxalq Universitet kimi fəaliyyət göstərəndə də orada bazar yaradılıb. Bu işlərin arxasında təkcə Elşad Abdullayev dayanmır. Bu gün təhsil naziri Misir Mərdanovun çox lazımlı bir addım atdı və həmin universiteti bağladı. Nazir universitetinin qanunsuzluqla məşğul olduğunu etiraf etdi. Lakin bunu çoxdan etmək lazım idi. Bununla mübarizə aparmaq, bu məsələni ictimailəşdirmək lazımdır. Qanunsuz qəbul olunanlara heç bir sənəd verilə bilməz. Çünki Tələbə Qəbulu üzrə Dövlət Komissiyasının test imtahanından kənar universitetə daxil olanlar sadəcə, Elşad Abdullayevin bir obyektindən sənəd alıblar. O sənədləri hər kəs verə bilər”.

Təhsil Nazirliyinin baş məsləhətçisi İlyar Vahabov isə APA-ya bu gün tədbir keçirən tələbələrin universitetə qanunsuz yolla qəbul olunduğunu bildirib: “Tələbə Qəbulu üzrə Dövlət Komissiyasının test imtahanlarından kənar, qanunsuz yolla universitetə qəbul olan və köçürülən şəxslərə heç bir köməklik göstərilə bilməz. Kim qanuni yolla universitetə qəbul olunubsa, onların heç bir problemi yoxdur. Normal şəkildə digər universitetlərə köçürülüblər və təhsillərini başa vuran şəxslərə də heç bir problem olmadan diplomları veriləcək. Bu gün tədbir keçirdən tələbələr də Tələbə Qəbulu üzrə Dövlət Komissiyasının test imtahanlarından kənar olaraq, qanunsuz yolla universitetə qəbul olunduğundan və köçürüldüklərindən onların diplomları verilmir. Biz Tələbə Qəbulu üzrə Dövlət Komissiyasının nazirliyə təqdim etdiyi siyahı əsasında işləyirik. Həmin siyahıda adları olmayan şəxslərə köməklik göstərilə bilməz”.