Sosial

Ana səhifə

Sosial

Gənclər üçün Təhsil Mərkəzi “Tanıyaq, Tanıdaq” proqramının təqdimat mərasimini keçirib

29 sentyabr 2010 09:54 (UTC +04:00)

Bakı. Ülkər Qasımova – APA. Bu gün Azərbaycan Dövlət İncəsənət Muzeyində Gənclər üçün Təhsil Mərkəzinin yeni icra etməyə başladığı “Tanıyaq, Tanıdaq” proqramının təqdimat mərasimi keçirilib.

APA-nın məlumatına görə, tədbirdə çıxış edən mərkəzin direktor müavini Elnur Axundov bildirib ki, iki il müddətində icra olunması planlaşdırılmış proqramın əsas məqsədi ölkəmizin mədəni irsinin, o cümlədən tarixi mədəniyyət obyektlərinin, incəsənət ocaqlarının, teatr və muzeylərinin, milli adət və ənənələrinin, milli mətbəxinin, milli kinolarının, xalq yaradıcılığının, eləcə də mədəniyyət və incəsənət xadimlərimizin yerli və xarici gənclər tərəfindən yaxından tanıdılmasıdır: “Proqramın əsas hədəfləri Azərbaycanın mədəniyyətini və incəsənətini sevən, ona yaxından bələd olan və qorumağa çalışan gənclər ordusunun sıralarının genişlənməsi, mədəniyyət və incəsənətimizə dünya ictimaiyyətinin diqqətini cəlb etmək, ölkəmizdə olan əcnəbilərin Azərbaycanımız haqqında dolğun məlumat və yüksək fikirlərlə ölkəmizdən ayrılmasıdır. Qarşıya qoyulan məqsədə çatmaq üçün proqramın icrası müddətində muzey və teatr həftəliklərinin keçirilməsi, xarici ölkə universitetlərində Azərbaycan mədəniyyət dərnəklərinin qurulması, orta məktəblərdə mədəniyyət muzeylərinin və mədəniyyət mərkəzlərinin virtual bazasının formalaşdırılması, milli kino həftəliklərinin keçirilməsi, musiqi və xalq yaradıcılığı gecələrinin təşkil olunması, milli bayramların əcnəbilərlə birgə qeyd olunması, tanınmış mədəniyyət və incəsənət xadimləri ilə görüşlər və digər bu kimi tədbirlərin keçirilməsi nəzərdə tutulur”.

Tədbirdə qeyd olunub ki, proqramın əsas hədəf qrupları yuxarı sinif şagirdləri, tələbələr, region gəncləri, gənclər təşkilatları, dövlət qurumlarında və özəl müəssisələrdə çalışan gənclər, Azərbaycan təhsil alana və işləyən əcnəbi gənclər, xarici ölkələrin təhsil müəssisələrinin kollektivləri və xarici ölkələri mətbu orqanlarıdır.

Tədbirdə millət vəkilləri Fəttah Heydərov, Sabir Rüstəmxanlı və digər dövlət rəsmiləri də iştirak edib.