Sosial

Ana səhifə

Sosial

Pan Gi Mun: “Ötən üç onillik ərzində ahılların sayı ikiqat artıb”

30 sentyabr 2010 11:19 (UTC +04:00)

Bakı. Laçın Sultanova – APA. Oktyabrın 1-i Beynəlxalq Ahıllar Günü kimi qeyd olunur. BMT-nin Bakı nümayəndəliyinin yaydığı məlumata görə, BMT-nin baş katibi Pan Gi Mun bu günlə bağlı müraciətlə çıxış edib.
Müraciətdə deyilir ki, BMT 20 ildir ki, bu günü qeyd edir, ahılların hüquqları və rifahı uğrunda, onların səslərinin eşidilməsi üçün uzun müddət mübarizə aparır: “Bu ildönümündə biz çətinliklə qazanılmış nailiyyətləri, xüsusilə də Minilliyin İnkişaf Məqsədləri (MİM) ilə bağlı uğurları qeyd edirik. Bir çox ölkələrdə ahıllar yoxsulluq və aclıq dərəcəsinin azalmasından, dərmanlar və səhiyyə xidmətlərindən istifadənin asanlaşmasından, daha geniş təhsil və iş imkanlarından faydalanmışlar. Ahıl insanların sayı və nisbəti sürətlə artır. Ötən üç onillik ərzində onların sayı ikiqat artmışdır. 2050-ci ilə qədər qlobal səviyyədə ahıl insanların sayı 2 milyarda çatacaq. Bu isə dünyanın demoqrafik quruluşunda dəyişiklik etməklə, hər birimizə təsir göstərəcək. Bu Beynəlxalq Gündə mən hökumətləri ahılların ehtiyacları ilə əlaqədar daha çox tədbirlər görməyə səsləyirəm. Əsas fəaliyyət istiqamətləri məlumdur: hər kəsə sosial xidmətlərdən istifadə etmək imkanı; təqaüd planlarının sayının və keyfiyyətinin artırılması; iş yerlərində yaş və gender ayrı-seçkiliyinin qarşısını alan qanun və strategiyaların hazırlanması. MİM-lər üçün qoyulmuş son tarix olan 2015-ci ilə beş il qaldığı bir vaxtda hökumətlərin milyonlarla ahıl insanı yoxsulluqdan xilas edəcək, onların şərəfli, məhsuldar və sağlam həyata hüquqlarını təmin edəcək maliyyə, hüquqi və sosial müdafiə tədbirlərini tətbiq etməsinin tam zamanıdır”.

BMT baş katibi