Sosial

Ana səhifə

Sosial

İctimai infrastrukturların əlillərin fiziki və iqtisadi tələblərinə uyğunluğu mövzusunda konfrans keçirilib

01 oktyabr 2010 10:12 (UTC +04:00)

Bakı. Elnur Hüseynquluyev - APA-Economics. Bu gün «Əmlak Bazarı İştirakçıları» (ƏBİ) İctimai Birliyinin «İctimai infrastrukturların əlillərin fiziki və iqtisadi tələblərinə uyğunluğunun öyrənilməsi və mövcud problemlərin həlli üçün təkliflərin hazırlanması» layihəsinin ilk mərhələsinin yekunu ilə bağlı mətbuat konfransı keçirilib.

«APA-Economics»in məlumatına görə, tədbirdə ƏBİ-nin icraçı direktoru Ramil Osmanov bildirib ki, layihənin məqsəd və vəzifələri ölkədə fəaliyyət göstərən əlillər cəmiyyətləri, QHT-lər, müvafiq dövlət strukturları ilə görüşlərin təşkili, kommersiya və dövlət qurumlarının diqqətini əlillərin daşınmaz əmlak və infrastrukturlardan tələbatlarına müvafiq istifadə edə bilməsi üçün zəruri tədbirlər görməsinə nail olmaqdan ibarətdir.

R.Osmanovun sözlərinə görə, layihənin ilkin mərhələsinin nəticələrindən məlum olub ki, son illər ərzində əlillərin sosial problemlərinin həlli istiqamətində dövlət tərəfindən çoxsaylı tədbirlər həyata keçirilib, əlillərə dövlət qayğısının xeyli artırılmasına baxmayaraq, bu tədbirlər əlillərin problemlərini tam həll edə bilməyib, diqqətdən yayınmış bir sıra ciddi problemlər qalmaqdadır. Aparılan araşdırmalar göstərib ki, daşınmaz əmlak komplekslərinin, şəhər və kənd infrastrukturlarının əlillərin fiziki və iqtisadi tələblərinə uyğunluğu, daha doğrusu, uyğunsuzluğu hazırda əlillərin sosial problemləri qədər aktualdır.

Statistikaya əsasən ölkədə 22 500 nəfərə yaxın I qrup əlil var ki, digər sosial qruplarla müqayisədə onların hərəkət imkanları daha məhduddur. Təkcə Bakı şəhərindəki hündürmərtəbəli binaların infrastrukturunun, digər ictimai əhəmiyyətli obyektlərdəki mövcud infrastrukturun əlillərin tələblərinə cavab vermədiyi açıq-aşkar üzə çıxır. Köhnə hündürmərtəbəli binaların əksəriyyətində liftlərin işləməməsi, yaxud lift meydançalarının əlil arabalarının hərəkətinə uyğunsuzluğu, ticarət və xidmət obyektlərindəki pilləkən meydançalarında əlillərin və əlil arabalarının hərəkəti üçün nəzərdə tutulmalı olan köməkçi yolların olmaması bu problemlər sırasında əsas yerləri tutur. Bundan başqa, paytaxt yollarında əlillərin təhlükəsiz hərəkətini təmin edən siqnallı işıqforların sayının məhdudluğu, yolkənarı səkilərin bəzi ərazilərdə obyekt sahibləri tərəfindən zəbt olunması və bunun əlillərin hərəkətinə maneə yaratması, səkidən yola və ya əksinə hərəkət pilləkənlərinin olmaması, yeraltı və yerüstü keçidlərin bəzilərində əlillərin hərəkətinə kömək edəcək vasitələrin (panduslar) yoxluğu və digər bu kimi onlarla problemin mövcudluğu onsuz da qeyri-normal hərəkət rejimində olan əlillərin problemlərini bir qədər də artırır.

Layihənin ikinci mərhələsində əlil təşkilatlarının nümayəndələri və müvafiq dövlət qurumlarının məsul şəxsləri ilə görüşlər davam etdiriləcək, müzakirələr aparılacaq, problemlər daha dərindən araşdırılacaq və sonda mövcud problemlərin həlli üçün təkliflər hazırlanacaq.

Tədbirdə çıxış edən Gözdən Əlillər Cəmiyyətinin sədri Səmiyar Abdullayev bu sahədə Azərbaycanda ciddi problemlər olduğunu bildirib: «Bəzi dövlət qurumlarının inzibati binaları istisna olmaqla qalan obyektlərdə əlillər üçün xüsusi yerlər nəzərdə tutulmayıb. Bütün bunlar yeni bina və ya yeraltı keçidlər inşa olunan zaman mühəndislərin qeyri-peşəkarlığının nəticəsidir. Azərbaycanda ictimai infrastrukturların inşası zamanı Azərbaycan Nəqliyyat Nazirliyi də daxil olmaqla bütün aidiyyəti qurumlar əlilləri nəzərə almalıdır».

Karlar Cəmiyyətinin sərdi Musa Tukanov isə bildirib ki, hazırda cəmiyyətin balansında olan bir neçə istehsal müəssisələri Əmlak Məsələləri Dövlət Komitəsi tərəfindən özəlləşdirilib. Bundan başqa, cəmiyyətin balansında olan bir neçə istehsal müəssisəsi məcburi köçkünlər tərəfindən zəbt olunub. Cəmiyyətin əmlakının geri qaytarılması ilə bağlı hətta ölkə başçısına da müraciət olunub.

Qeyd edək ki, statistikaya görə, Azərbaycanda 1,3 mln. nəfər əmək pensiyası alır. Bunun 23,9%-i əlilliyə görə pensiya alanlardır. Ümumilikdə isə ölkədə 420 min nəfərə yaxın əlil var ki, bunun da 33 min nəfəri gözdən əlillərdir. Gözdən əlillərin 8 500 nəfəri əmək pensiyası alan əlillər təşkil edir.