Sosial

Ana səhifə

Sosial

Nazirlər Kabineti respublika ərazisində çöl quşlarının ovlanmasına qoyulmuş qadağanın xüsusi göstəriş olanadək götürülməsi barədə qərar qəbul edib

20 oktyabr 2010 16:40 (UTC +04:00)

Bakı-APA. Nazirlər Kabinetində baş nazirin birinci müavini Yaqub Eyyubovun sədrliyi ilə “Azərbaycan Respublikasında quş qripi xəstəliyinin qarşısının alınması və bu sahədə bütün qurumların birgə fəaliyyətinin əlaqələndirilməsi üzrə Dövlət Komissiyası”nın növbəti iclası keçirilib. APA-nın “AzərTAC”a istinadən yaydığı məlumata görə, iclasda Azərbaycan Ovçular və Balıqçılar Cəmiyyəti Birliyinin, əhalinin ölkədə çöl quşlarının ovuna icazə verilməsi barədə müraciətlərinə baxılıb. Qeyd olunub ki, 2006-cı ildən etibarən respublikamızın quşçuluq təsərrüfatlarında, eləcə də qoruq və su hövzələri ərazilərində aparılan çoxsaylı monitorinqlər nəticəsində quş qripi xəstəliyi müəyyən edilməyib. Hazırda quş qripi ilə bağlı ölkədə epizootik vəziyyəti tam sabitdir.
Bu vəziyyəti, habelə “Azərovçu”nun və əhalinin çoxsaylı müraciətlərini nəzərə alan Dövlət Komissiyası “Azərbaycan Respublikası ərazisində quş qripi xəstəliyinin profilaktikasına dair Fövqəladə Tədbirlər planı”na müvafiq olaraq, respublika ərazisində çöl quşlarının ovlanmasına qoyulmuş qadağanın xüsusi göstəriş olanadək götürülməsi barədə müvafiq qərar qəbul edib. Dövlət Komissiyası, eyni zamanda, Kənd Təsərrüfatı, Ekologiya və Təbii Sərvətlər, Səhiyyə nazirliklərinə, digər müvafiq qurumlara ölkədə quş qripi ilə əlaqədar vaxtaşırı monitorinqlərin aparılmasına, həmçinin “Fövqəladə Tədbirlər Planı”nın tələblərinin həyata keçirilməsinə nəzarəti davam etdirməsinə dair göstəriş verib. O cümlədən “Azərbaycan Respublikasının ərazisində ovçuluğun aparılması Qaydaları”nın təsdiq edilməsi haqqında Nazirlər Kabinetinin 2005-ci il 27 yanvar tarixli qərarına uyğun olaraq, ovçuların və əhalinin quş ovuna riayət etmələri üçün lazımi tədbirlər görərək, bu barədə onları məlumatlandırılmaq tapşırılıb.