Sosial

Ana səhifə

Sosial

Ekologiya və Təbii Sərvətlər Nazirliyinin “Qaynar xətt”inə səs-küy, kəskin qoxu və məişət tullantı sularının axıdılması ilə bağlı 18 müraciət edilib

03 noyabr 2010 07:35 (UTC +04:00)

Bakı. İlhamə İsabalayeva - APA. Bu ilin III rübü ərzində Ekologiya və Təbii Sərvətlər Nazirliyinin “Qaynar xətt”inə səs-küy, kəskin qoxu və məişət tullantı sularının axıdılması ilə əlaqədar 18 müraciət daxil olub. Nazirliyin mətbuat xidmətindən APA-ya verilən məlumata görə, müraciətlər araşdırılaraq qanuna müvafiq tədbirlər görülüb.
Abşeron rayonu Novxanı qəsəbəsi Yeni yaşayış massivində yaşayan F. Kərimov tərəfindən həmin ərazidə yerləşən daş karxanasından gələn səs-küy və toz dumanı barədə daxil olmuş şikayətlə bağlı karxananın sahibi fiziki şəxs qismində cərimələnib.
Xətai rayonu, S.Vəzirov küçəsi 26 ünvanında yaşayan F.Sofiyevin “A+AS” MMC tərəfindən beton istehsalı zamanı havaya toz qalxması ilə bağlı şikayətinə görə müəssisə rəhbərliyinə məcburi göstəriş verilib.

Nərimanov rayonu H.Əliyev prospekti 73/5 mənzil 31 ünvanında yaşayan A.Zəkiyev tərəfindən həmin ərazidə quraşdırılmış “Azercell” şirkətinə məxsus antenadan yayılan şüalar barədə daxil olmuş müraciətlə bağlı monitorinq keçirilib, stansiyanın sənədlərinin və gigiyenik sertifikatın olması müəyyən edilib.
Havadan gələn kəskin qoxu ilə əlaqədar daxil olmuş 4 müraciətlə bağlı monitorinq keçirilib və atmosfer havasının tərkibində olan çirkləndirici qaz birləşmələrinin, səs-küylə əlaqədar daxil olmuş 3 müraciətlə bağlı səs-küy səviyyəsinin qəbul olunmuş normalar daxilində olduğu müəyyənləşdirilib. İ.Əliyev tərəfindən Binəqədi rayonu Dərnəgül şosesində yerləşən metaləritmə zavodunun atmosferi çirkləndirməsi barədə daxil olmuş müraciət icradadır.