Sosial

Ana səhifə

Sosial

Millət vəkili Qənirə Paşayeva və Ombudsman Elmira Süleymanova Qurban bayramı münasibətilə “N” saylı hərbi hissədə əsgərlərlə görüşüblər

14 noyabr 2010 15:16 (UTC +04:00)

Tovuz. Ayxan Hüseynov - APA. Azərbaycan Ombudsmanı Elmira Süleymanova və millət vəkili Qənirə Paşayeva Tovuz rayonunda yerləşən N saylı hərbi hissədə olublar. Onlar əsgərlərin andiçmə mərasimində iştirak edərək təbriklərini çatdırıblar APA-nın qərb bürosunun məlumatına görə, yeni xidmətə başlamış əsgərlər Vətənə sadiq olacaqlarına, layiqli xidmət edəcəklərinə and içiblər.

Daha sonra əsgərlər qarşısında çıxış edən millət vəkili Qənirə Paşayeva və Ombudsman Elmira onları Quran bayramı və andiçmə münasibətilə təbrik edib, onlara Vətənə və valideynlərinə layiqli övlad olmalarını, vəzifə borclarını layiqincə yerinə yetirməyi arzulayıblar. Daha sonra kəşfiyyat bölüyünün əsgərlərinin nümunəvi çıxışları olub. Bundan sonra millət vəkili Qənirə Paşayeva və Ombudsman Elmira Süleymanova xidmətdə fərqlənən əsgər və zabitlərə hədiyyələr veriblər.

Tədbirdən sonra jurnalistlərə açıqlama verən Q. Paşayeva bayramlarda şəhid ailələri, müharibə veteranları və yaxınlarından uzaqda xidmət edən hərbçilərlə birlikdə olmağın vacibliyini qeyd edib: “Bu gün bu hərbi hissədə bizim 443 gəncimiz Vətən qarşısında, millət qarşısında, dövlətimiz qarşısında şərəflə, namusla, ən yüksək səviyyədə xidmətlərini yerinə yetirəcəklərinə and içdilər. Bizim hamımızın bu bayramda ən böyük arzusu gələn Qurban bayramına qədər Ali Baş Komandanımızın rəhbərliyi altında torpaqlarımızın işğaldan azad olunmasıdır”.

Ombudsman E. Süleymanova isə son illərdə ordumuzun inkişafından söhbət açıb: “Son illər ordu quruculuğu sahəsində çox böyük işlər aparılır. 20 faizədək torpağı işğal olunan, 1 milyona yaxın qaçqın və məcburi köçkünü olan bir respublika üçün orduq quruculuğu çox vacibdir. Mən bu gün burda yüksək hazırlığa malik Azərbaycan Ordusu görürəm. Bu, qəlbimizə bir inam toxumu səpir ki, qələbə günü uzaqda deyil”.

Tədbirdə Azərbaycanın Milli Qəhrəmanı Mübariz İbrahimovun əmisi Fazil İbrahimov da çıxış edərək qardaşı oğlunun qəhrəmanlığından söz açıb, bütün əsgərlərə onun kimi igid və cəsarətli olmağı arzulayıb.

Qeyd edək ki, M. İbrahimovun əmisi oğlu da Tovuzda yerləşən “N” saylı hərbi hissədə xidmət edir.