Sosial

Ana səhifə

Sosial

Son 5 il özəlləşdirilən 83 uşaq bağçasından yalnız 6-sı öz profili üzrə işləyir

18 noyabr 2010 12:07 (UTC +04:00)

Bakı. İlhamə İsabalayeva-APA. “Təhsil Nazirliyi özəlləşdirməyə çıxarılan, lakin özəlləşdirilməyən məktəbəqədər təhsil müəssisələrinin gələcəkdə özəlləşdirilməyə çıxarılmaması və dövlətin himayəsində qalması ilə bağlı baş nazir Artur Rasizadəyə müraciət edib. Biz bu barədə təkliflərimizi irəli sürmüşük, ancaq hələ buna cavab verilməyib”. Bu sözləri APA-ya açıqlamasında Təhsil Nazirliyinin məktəbəqədər təhsil sektorunun müdiri Nərminə Alnağıyeva deyib.

Onun sözlərinə görə, ölkə prezidentinin sərəncamı ilə 2006-cı ildə ölkə üzrə özəlləşdirməyə açıq elan edilən 240 bağçadan yalnız 83-ü özəlləşib. Onun 47-i Bakı bağçalarının payına düşür.

Nazirlik rəsmisi deyib ki, özəlləşdirilən bağçalardan hazırda yalnız 6-sı öz profili üzrə işləyir: “Özəlləşdirmədə əsas şərt odur ki, müəssisəsi özəlləşdirmədən sonra da öz profili üzrə işləsin. Əgər bağçadırsa, bağça kimi fəaliyyət göstərməlidir. Ancaq təəssüf ki, yalnız 6 bağça istisna olmaqla, özəlləşdirilən bağçalar öz profilləri üzrə fəaliyyət göstərmir. Onların ya qapısı bağlıdır, ya da bərbərxana, aptek, mobil telefon satışı mağazası, geyim mağazası kimi fəaliyyət göstərir. Həmin bağçaların öz profili üzrə işləməməsi barədə artıq lazımi dövlət orqanlarına məlumat vermişik”.

N. Alnağıyeva deyib ki, özəlləşdirilməyə çıxarılan, lakin hələ özəlləşdirilməyən müəssisələr dövlət təminatındadır. Amma müəssisə özəlləşdirildikdən sonra artıq
dövlət təminatından çıxarılaraq sahibkara verilir: “Həmin özəlləşdirilən müəssisələr də artıq nazirliyin balasından çıxıb. Ona görə də onların yenidən öz profili üzrə işləməsinə məcbur etmək, buna görə onları cəzalandırmaq nazirliyin səlahiyyətində deyil. Bu məsələ ilə xüsusi qurumlar məşğul olmalıdır”.