Sosial

Ana səhifə

Sosial

Mingəçevirdə insan alverinə qarşı mübarizəyə dair keçirilən regional seminar başa çatıb

14 dekabr 2010 16:44 (UTC +04:00)

Mingəçevir. Şahnəzər Bəşirov - APA. ATƏT-in Bakı Ofisi, Beynəlxalq Miqrasiya Təşkilatı və Azərbaycan Daxili İşlər Nazirliyinin birgə təşkilatçılığı ilə dekabrın 14-də Mingəçevir şəhərində insan alverinə qarşı mübarizəyə dair regional seminar keçirilib. APA-nın yerli bürosunun xəbərinə görə tədbirdə ATƏT-in Bakı Ofisi rəhbərinin müavini Melissa Stoun, ATƏT-in Baş Ofisinin nümayəndəsi Alberto Andreani, Daxili İşlər Nazirliyinin İnsan Alverinə qarşı Mübarizə İdarəsinin əməkdaşı İlkin Qurbanov, Beynəlxalq Miqrasiya Təşkilatının nümayəndəsi Sərhan Aktofrak, ATƏT-in layihə rəhbəri Təranə Bağırova, eləcə də Mingəçevir şəhərinin, Şəki, Yevlax və Tərtər və Bərdə rayonlarının hüquq-mühafizə orqanlarının, əmək və əhalinin sosial müdafiəsi mərkəzlərinin, miqrasiya təşkilatlarının və yerli QHT-lərin nümayəndələri iştirak ediblər.

Seminarda hüquq-mühafizə orqanların insan alverinə qarşı mübarizəsinin gücləndirilməsi, insan alverinə qarşı ictimaiyyətin məlumatlandırılması, regiondakı QHT-lərin bu sahədə əməkdaşlığa cəlb edilməsi, insan alverçilərinin cinayət təqibi, belə faktların araşdırılması və sübutların toplanılması yolları, insan alveri qurbanlarının aşkara çıxarılması və müdafiəsi məsələləri müzakirə olunub, mövcud qanun və qərarlar barədə tədbir iştirakçılarına məlumat verilib.

Çıxışlarda bildirilib ki, Azərbaycan insan alveri ilə mübarizə sahəsində bir sıra beynəlxalq sənədlərə qoşulub və dövlət başçısı İlham Əliyevin 6 fevral 2009-cu il tarixli Sərəncamı ilə İnsan Alverinə Qarşı Mübarizə üzrə Milli Fəaliyyət Planı (2009-2013-cü illər) təsdiqlənib.
Seminarda vurğulanıb ki, insan alverinə qarşı mübarizədə maarifləndirmə işinin aparılması və cəmiyyətin də bu məsələyə münasibəti əhəmiyyətli dərəcədə vacibdir. Qeyd olunub ki, görülən işlərin nəticəsi olaraq, Azərbaycanda insan alveri halları getdikcə azalmaqdadır. Bildirilib ki, cari ilin 11 ayında ölkədə insan alveri ilə bağlı 70 cinayət faktı qeydə alınıb və 34 nəfər müqəssir şəxs qismində məsuliyyətə cəlb olunub. 34 insan alveri qurbanı müəyyən edilib və onların böyük əksəriyyəti cəmiyyətə inteqrasiya edilib.

insan alveri