Sosial

Ana səhifə

Sosial

“Quş qripi” ilə əlaqədar Azərbaycan ərazisində keçirilən monitorinqin nəticələri açıqlanıb

15 dekabr 2010 12:58 (UTC +04:00)

Bakı. İlhamə İsabalayeva - APA. Kənd Təsərrüfatı Nazirliyi yanında Dövlət Baytarlıq Xidməti (DBX) “quş qripi” xəstəliyinin profilaktikası məqsədilə ölkə ərazisində apardığı monitorinqin nəticələrini açıqlayıb. Dövlət Baytarlıq Xidmətindən APA-ya verilən məlumata görə, monitorinq zamanı seçmə üsulla götürülən 46 baş çöl quşunun patoloji materialı, ölkənin ayrı-ayrı quşçuluq və həyətyanı təsərrüfatlardan gətirilən 1815 baş ev quşunun qan nümunələri, eləcə də 98 baş ev quşunun patoloji materialı Respublika Baytarlıq Laboratoriyasında müvafiq müayinələrdən keçirilib. Nümunələrin heç birində “quş qripi” xəstəliyinin törədicisi müəyyən edilməyib.

Bu nəzarət tədbiri köçəri quşların müvəqqəti məskunlaşdığı Abşeron yarımadası, Şabran, Salyan, Ağcabədi və Lənkəran rayonlarındakı milli park və qoruqlarda, eləcə də dənizsahili zonalarda həyata keçirilib. Hərtərəfli monitorinqin aparıldığı ərazilərdə nə xəstə, nə də xəstəlikdən tələf olan quşlara təsadüf olunmayıb.

DBX əhalinin və quşçuluq təsərrüfatı rəhbərlərinin nəzərinə çatdırır ki, köçəri quşların miqrasiyası ilə əlaqədar ev və sənaye quşları mütləq qapalı şəraitdə saxlanılmalıdır. Bütün növ quşların ovlanması, qanunla müəyyən edilməyən yerlərdə və ticarət obyektlərində diri quşların, quş əti və məhsullarının satışı qadağandır. Bu qadağa ticarət üçün xüsusi ayrılmış yerlərdə (bazarlarda, yarmarkalarda) dövlət baytarlıq orqanlarında uçotda olan baytarlıq nəzarəti obyektlərindən baytarlıq normalarına cavab verən, baytarlıq-sanitariya ekspertizasından keçirilmiş və müvafiq baytarlıq sənədləri ilə müşayiət edilən quş əti və onun məhsullarına aid edilmir.

Quşların miqrasiyasını əsas götürərək növbəti monitorinqin dekabrın 20-də başlanması nəzərdə tutulur. Hazırda ölkədə epizootik vəziyyət sabitdir.

quş_qrip