Sosial

Ana səhifə

Sosial

«Xalq Bank» ASC «Xalq Əmanəti» seriyasının ikinci buraxılışının təqdimatını keçirib

27 dekabr 2010 16:16 (UTC +04:00)

Bakı. Elnur Hüseynquluyev - APA-Economics. Azərbaycanın «Xalq Bank» ASC bu gün «Xalq Əmanəti» seriyasının ikinci buraxılışını təqdim edib.

«APA-Economics»in məlumatına görə, layihə çərçivəsində ikinci nəşr Azərbaycanın xalq şairi Məmməd Arazın (1933-2004) yaradıcılığına həsr olunub. nəşrin redaktoru Səlim Babullaoğludur.

Tədbiri açıq elan edən “525-ci qəzet”in baş redaktoru, Azərbaycan Yazıçılar Birliyinin katibi Rəşad Məcid Məmməd Araz yaradıcılığı haqqında geniş məlumat verib. O bildirib ki, bu kitab gələcək nəsillər üçü çox vacib yadigardır.

Dövlət və milli mükafatlar laureatı, xalq şairi Məmməd Araz 1995-ci ildə Azərbaycanın ali dövlət mükafatı olan «İstiqlal» ordeni ilə ilk dəfə təltif olunan üç şairdən biridir. Təqdim olunan «Seçilmiş əsərləri»n unikallığı ondadır ki, kitabın format və dizaynı şairin özü tərəfindən 1968-ci ildə yazdığı «Vəsiyyət» şeirində təsvir edilib.

Qeyd edək ki, «Xalq Bank» xalqın mədəni irsinin qorunub gələcək nəsillərə ötürülməsi, mənəvi dəyərlərin dünyaya tanıdılması istiqamətində «Xalq Əmanəti» mədəniyyət layihəsini həyata keçirir. Bu layihə çərçivəsində Azərbaycanın görkəmli ədəbiyyat, incəsənət və elm xadimlərinin əsərləri, eləcə də xalq yaradıcılığı, folklor nümunələri nəfis tərtibatda nəşr olunub sənətsevərlərin ixtiyarına verilir. Bu ilin əvvəlindən start götürən layihənin ilk buraxılışı oktyabr ayının 22-də işıq üzü görüb və Azərbaycanın görkəmli rəssamı Böyükağa Mirzəzadəyə həsr olunub.