Sosial

Ana səhifə

Sosial

Umayra Tağıyeva: “Azərbaycan paytaxtında yaxın günlərdə şaxta gözlənilmir, yanvarın ikinci ongünlüyündə isə temperatur bir qədər yüksələcək”

07 yanvar 2011 10:24 (UTC +04:00)

Bunu APA-ya açıqlamasında Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosunun direktoru Umayra Tağıyeva deyib.

O qeyd edib ki, Azərbaycanın Daşkəsən-Gədəbəy zonasında, İsmayıllıda, eləcə də bir çox rayonlarına düşən yağıntı qar şəklindədir. Buna görə yalnız Bakıdakı hava şəraitini əsas götürərək ölkədə qışa uyğun hava şəraitinin müşahidə edilmədiyini demək olmaz: “Ölkə ərazisindəki hava şəraiti mülayim qış fəsli üçün xarakterikdir. Hazırda respublikanın hətta Aran rayonlarında da gecə saatlarında şaxta müşahidə edilir. Həmin ərazilərdə minimal temperatur 3 dərəcə şaxtadan 2 dərəcəyədək istidir. Belə temperatur dekabr ayında olmayıb. Dağlıq ərazilərdə gecə saatlarında havanın temperaturu 4-8 dərəcə şaxta təşkil edir. Abşeron yarımadasında da günorta saatlarında temperatur 8-10 dərəcədən yüksək deyil. Nisbətən mülayim keçən qış fəsli üçün belə temperaturlar xarakterikdir”.

U. Tağıyeva deyib ki, yanvarın 12-dək Azərbaycanda hava şəraiti qeyri-sabit keçəcək. Yanvarın 8-də axşam saatlarından başlayaraq, yanvarın 9, 10 və 11-də havanın temperaturu getdikcə 3-5 dərəcə aşağı düşəcək. Eyni zamanda, yanvarın 12-si gündüzədək respublika ərazisində fasilələrlə yağıntı müşahidə ediləcək. Dağlıq və bəzi dağətəyi rayonlarda isə qar yağacağı gözlənilir. Axşama doğru yağıntıların ayrı-ayrı yerlərdə intensivləşəcəyi ehtimalı var. Bakı və Abşeron yarımadasında gözlənilən əsas yağıntılar isə yağış şəklində olacaq: “Hələ ki, çox şaxtalı günlər müşahidə edilmir. Amma yaxın 3-4 gün ərzində havanın temperaturu düşəcək və yanvarın iqlim normasına uyğun olacaq. Yanvarın ortalarınadək isə Bakıda şaxta gözlənilmir”.

U. Tağıyevanın sözlərinə görə, yanvarın 12-dən sonra ölkə ərazisində hava yenidən mülayimləşəcək. Yanvarın 13, 14 və 15-də temperatur bir qədər yüksələcək: “Yanvarın 13-dək temperatur iqlim normasından bir qədər aşağı olacaq. Yanvarın II ongünlüyündə isə temperatur bir qədər yüksələcək”.

hava