Sosial

Ana səhifə

Sosial

Nazirlər Kabineti “Ümumtəhsil məktəbinin Nümunəvi Nizamnaməsi”ni təsdiqləyib

14 yanvar 2011 15:25 (UTC +04:00)

Bakı. Rəşad Süleymanov – APA. Azərbaycan Nazirlər Kabineti “Ümumtəhsil məktəbinin Nümunəvi Nizamnaməsi”ni təsdiq edib. Bu barədə APA-ya Nazirlər Kabinetindən məlumat verilib.

Sənədə əsasən mülkiyyət formasına görə dövlət ümumtəhsil məktəbləri ilə yanaşı, bələdiyyə və özəl ümumtəhsil məktəbləri də təşkil edilə bilər. Dövlət ümumtəhsil məktəblərində təhsil pulsuzdur. Ümumtəhsil məktəbində siyasi partiyaların və dini qurumların strukturlarının yaradılmasına və fəaliyyətinə yol verilmir. Məktəblərdə təhsil alanların geyim forması hər bir məktəbin öz nizamnaməsi ilə müəyyən olunmalıdır. Tədris dili dövlət dili - Azərbaycan dili olsa da, vətəndaşların və təsisçilərin istəyindən asılı olaraq Azərbaycan dili, Azərbaycan ədəbiyyatı, Azərbaycan tarixi, Azərbaycan coğrafiyası fənləri tədris olunmaq şərtilə ümumtəhsil məktəblərində tədris müvafiq dövlət təhsil standartları əsasında digər dillərdə də aparıla bilər.

Ümumtəhsil məktəbi ibtidai (I-IV siniflər), ümumi orta (V-IX siniflər) və tam orta (X-XI siniflər) təhsil səviyyələrini əhatə edir. İbtidai (I-IV siniflər), ümumi orta (I-IX siniflər), tam orta (I-XI siniflər) məktəb formasında ayrı-ayrılıqda da təşkil oluna bilər. Ucqar kənd yerlərində şagirdlərin sayından asılı olmayaraq ibtidai və ümumi orta ümumtəhsil məktəblərinin azkomplektli formada fəaliyyətinə yol verilir.

Sənəddə həmçinin qeyd olunub ki, hər il sentyabrda 5 yaşı tamam olan əqli və fiziki cəhətdən normal inkişaf etmiş uşaqların məktəb təliminə psixoloji cəhətdən hazır olmalarını təmin etmək, habelə azsaylı xalqların uşaqlarının tədris dili ilə bağlı çətinliklərini aradan qaldırmaq məqsədilə ümumtəhsil məktəblərində müəyyən olunmuş qaydalara əsasən məktəbdə hazırlıq sinifləri açıla bilər. Ümumtəhsil məktəbinin I sinfinə hər il sentyabrın 15-dək 6 yaşı tamam olmuş uşaqlar qəbul edilirlər. Bununla belə, həmin müddətdə 6 yaşı tamam olmayan, lakin xüsusi istedadı ilə fərqlənən uşaqlar Təhsil Nazirliyinin müəyyən etdiyi qaydada I sinfə qəbul oluna bilərlər. Belə məktəblərdə siniflər şagirdlərin sayı 20 nəfər olmaqla müəyyən edilir.

Ümumtəhsil məktəbində dərs məşğələləri sentyabrın 15-də başlayıb mayın 31-də başa çatır. Dərs ili iki yarımilə bölünür: birinci yarımil - 15 sentyabr - 29 dekabr; ikinci yarımil - 6 yanvar - 31 may. Dərs ili ərzində aşağıdakı tətillər müəyyən edilir: 6 gün payız tətili (12-17 noyabr), 7 gün qış tətili (30 dekabr - 5 yanvar), 8 gün yaz tətili (17-24 mart). Birinci siniflər üçün 6 günlük (12-17 fevral) əlavə tətil müəyyən edilir.

Sənəddə ümumitəhsil məktəblərinə rəhbərlik, təhsilin təşkili, təhsil alanların hüquq və vəzifələri, təhsil verənlərin hüquq və vəzifələri və s. məsələlər əksini tapıb.