Sosial

Ana səhifə

Sosial

Qədim Qəbələ şəhərində yeni arxeoloji tədqiqatlar aparılır - FOTO

Qədim Qəbələ şəhərində yeni arxeoloji tədqiqatlar aparılır - <font color=red>FOTO</font>

15 avqust 2011 12:53 (UTC +04:00)

Bakı-APA. Qədim Qəbələ şəhərinin Qala hissəsində Azərbaycan Milli Elmlər Akademiyasının (AMEA) Arxeologiya və Etnoqrafiya İnstitutunun Qəbələ arxeoloji ekspedisiyası tərəfindən, professor Qafar Cəbiyevin rəhbərliyi, SEBA (Seul-Bakı) Azərbaycan-Koreya Mədəniyyət Mübadiləsi Assosiasiyasının maliyyə dəstəyi arxeoloji tədqiqatlar aparılır. APA-nın xəbərinə görə, bu ilin iyul ayından başlayaraq aparılan arxeoloji tədqiqatlar zamanı qədim Qəbələnin Qala ərazisində Güllü tala və Səlbir ilə müqayisədə nisbətən daha uzun müddət (I-XVIII əsrlər) ərzində yaşayış olduğu məlum olub. Şəhərin bu günədək mövcud olan ən möhtəşəm müdafiə tikililəri məhz Qala ərazisindədir. Orada mədəni təbəqənin, yəni yaşayış qatının qalınlığı bir sıra yerlərdə 5-6 metrə çatır.
Builki arxeoloji tədqiqatın əsas məqsədlərindən biri bu müxtəlif dövrləri əhatə edən mədəni təbəqələri aşkar edərək Qala ərazisindəcə elmi ekspozisiyanı yarada bilməkdir. 2009-cu ildə tədqiqatına başlanan 600 kvadratmetrlik sahə genişləndirilərək 1700 kv.m-ə çatdırılıb, hələlik iki mədəni təbəqə - son orta əsrlər (XIV-XVIII əsrlər) və orta əsrlər (IX-XIII əsrlər) təbəqələri öyrənilməkdədir. Yaxşı vəziyyətdə aşkar olunan iki ədəd dulus kürəsi və onun avadanlığı maraqlı tapıntılardandır. Arxeoloqlar hesab edirlər ki, ağzında qurğuşun tıxacı olan və içi dolu şar-konusvari qabın tapılması bu cür qabların təyinatına yenilik gətirəcək. Üzəri yazılı qablar (şəxs adı və şeirlər yazılmış), insan və heyvan təsvirli nəfis şirli və şirsiz qablarsa XI-XII əsrlərdə zəngin şəhər həyatından xəbər verir. Bu və digər tapıntılarla yerindəcə tanış olmaq üçün qazıntı müddətində xeyli turist qrupları və akademik heyət qədim Qəbələ şəhərinə gəliblər. İstər III Beynəlxalq Qəbələ Musiqi Festivalı zamanı, istərsə də fərdi qruplar şəklində qazıntı sahəsinə gələn turistlər görülən işləri maraqla qarşılayıblar. Bir neçə gün öncə “Rossiya-24” telekanalında III Qəbələ Musiqi Festivalı haqqında verilən geniş reportajda ekspedisiyanın fəaliyyəti də işıqlandırılıb.
Şəmkir rayonu Qaracəmirli abidəsində arxeoloji tədqiqat aparan beynəlxalq ekspedisiyanın Almaniya, Gürcüstan və Rusiyadan olan üzvləri qədim Qəbələ şəhərində olublar. Möhtəşəm qala divarları və arxeoloji tədqiqatın nəticələri xarici ölkə arxeoloqlarının marağına səbəb olub, aşkar edilən dulus kürələrinin nəinki Azərbaycanın orta əsrlər tarixinin, eləcə də dünyanın müxtəlif dövr keramika istehsalı texnologiyasının bir sıra məsələlərinin öyrənilməsində xüsusi əhəmiyyəti olduğu bildirilib. Onlara məlumat verilib ki, indiyə qədər Qala ərazisində ümumiyyətlə, 9 ayrı yerdə geniş qazıntılar aparılıb. Nəticələr nəşr olunub, beynəlxalq simpoziumlarda məruzə edilib. Mütəxəssislər abidənin konservasiyası və bərpasına dair suallar veriblər. Onlara bildirilib ki, SEBA (Seul-Bakı) Azərbaycan-Koreya Mədəniyyət Mübadiləsi Assosiasiyası ərazinin arxeoloji turizm obyekti kimi qorunması və təqdim olunması üçün geniş işlər görür, qarşıdakı dövr ərzində tədqiq olunan sahələrin üzərinin örtülməsi və konservasiya işlərinin aparılması ilə əlaqədar tədbirlər planlaşdırır.
Hal-hazırda şəhər ərazisində arxeoloji tədqiqatlar davam etdirilir.

qədim Qəbələ