Sosial

Ana səhifə

Sosial

“İçərişəhər” ərazisindən şəhərsalma və təsərrüfat fəaliyyəti üçün istifadə məhdudlaşdırılıb

26 sentyabr 2011 10:41 (UTC +04:00)

Bu barədə APA-ya Nazirlər Kabinetindən bildirilib. Əsasnaməyə əsasən, qoruğun mühafizə zonasının şəhərsalma və təsərrüfat fəaliyyəti üçün istifadəsi məhdudlaşdırılıb. Zonanın müəyyən edilməsində əsas məqsəd UNESCO-nun Dünya İrs Siyahısına daxil edilmiş İçərişəhərin tarixi-mədəni irsinin mühafizəsini, qoruq ərazisində yerləşən abidələrin bədii-estetik görkəmini, onların təhlükəsizliyini, funksional təyinatını və uzunömürlülüyünü təmin etməkdir.
Əsasnaməyə görə, İçərişəhərin mühafizə zonasının hüdudları daxilində yerləşən torpaq sahəsi və üzərindəki tikililər yeraltı mədəni təbəqələrlə birlikdə xüsusi hüquqi rejimli sahə hesab olunur. Zonada yerləşən torpaq sahəsi dövlət mülkiyyətindədir və onun bələdiyyəyə və ya xüsusi mülkiyyətə verilməsinə yol verilmir. Zonadan keçən yollarda nəqliyyat vasitələrinin hərəkəti qoruq ərazisində yerləşən abidələrin qorunması üçün təhlükə yaradarsa, idarə Nazirlər Kabinetinin Yol Hərəkəti Təhlükəsizliyi Komissiyası qarşısında həmin yollardan istifadəyə məhdudiyyətlərin tətbiqi və ya istifadənin tam dayandırılması barədə məsələ qaldırmalıdır.
Eyni zamanda mühafizə zonasında yerüstü və yeraltı abidələr üçün təhlükə yarada bilən torpaq, söküntü, tikinti-quraşdırma, yenidənqurma, abadlıq və təmir işlərinin aparılmasına yol verilməyəcək. Ərazidə torpaq işləri və mühəndis-kommunikasiya xətlərinin çəkilişi qoruğun mövcud qala divarlarından ən azı üç metr məsafə gözlənilməklə aparılmalıdır. Qeyd olunub ki, zonanın ərazisində qoruğun qala divarlarının, dünya və ölkə əhəmiyyətli abidələrin qarşısında yeni bina və tikililərin inşası qadağandır. Zonada abidələrin bədii-estetik görkəminə, təhlükəsizliyinə, funksional təyinatına və uzunömürlülüyünə xələl gətirməyən inşaat-təmir, işıqlandırma, bədii tərtibat və mövcud infrastrukturun yeniləşdirilməsi işləri Qoruq İdarəsinin razılığı ilə aparılır. Zonada inşaat-təmir işləri aparan fiziki və hüquqi şəxslər arxeoloji tapıntı, yaxud abidə aşkar etdikdə, işləri dərhal dayandırmalı, bu barədə Bakı Şəhər İcra Hakimiyyətinə, Qoruq İdarəsinə və AMEA-ya məlumat verməlidirlər. Bu halda görülməsi nəzərdə tutulmuş işlər AMEA-nın mütəxəssislərin rəyi əsasında davam etdirilə bilər.

İçərişəhər