Sosial

Ana səhifə

Sosial

Azərbaycan Həmkarlar İttifaqları Konfederasiyasında dövlət müstəqilliyinin bərpasının 20 illiyinə həsr olunan tədbir keçirilib

04 oktyabr 2011 10:52 (UTC +04:00)

Bakı. Ramil Məmmədli - APA-Economics. Bu gün Respublika Həmkarlar İttifaqları Konfederasiyasında Azərbaycanın dövlət müstəqilliyinin bərpasının 20 illiyinə həsr olunan tədbir keçirilib.

“APA-Economics”in məlumatına görə, hesabat xarakterli çıxış edən konfederasiyanın sədri Səttar Mehbalıyev deyib ki, ölkədə adambaşına düşən ÜDM 5 800 ABŞ dollarına qədər qalxıb. Orta əmək haqqı 1991-ci illə müqayisədə 26 dəfə yüksəlib. 2003-cü ildən bəri yoxsulluq 46%-dən 9,1%-ə enib, işsizliyin qarşısının alınması ilə bağlı ciddi tədbirlər görülüb.

Həmkarlar ittifaqlarının fəaliyyətinə toxunan S.Mehbalıyev bildirib ki, iş yerlərində sahə həmkarlar ittifaqlarına müraciət edilən ərizələrə diqqət və qayğı ilə yanaşılıb. 6 ay ərzində həmkarlar ittifaqlarına 400 mindən artıq ərizə və şikayətlər daxil olub ki, bunların da 85%-i müsbət həllini tapıb: “Çalışırıq ki, işçilərin sosial vəziyyətləri yaxşılaşsın, onların əməkhaqqı ailələrinin dolanması üçün yetərli olsun. Həmkarlar ittifaqlarının əsas vəzifəsi isə iş yerlərində təhlükəsiz əmək şəraitinin yaradılmasıdır. Sahə həmkarlar ittifaqlarının tərkibində əmək müfəttişləri də fəaliyyət göstərir. Onlar iş planı və qrafiki ilə tanış olmaq üçün idarə və müəssisələrə gedirlər”.

Tədbirdə həmkarlar ittifaqlarının rəhbər və üzvləri təmsil etdikləri qurumların fəaliyyəti haqda danışaraq, müstəqillik illərdə əldə olunan uğurlara diqqəti yönəldiblər.