Sosial

Ana səhifə

Sosial

AHİK sədri Səttar Mehbalıyev Misir Səhiyyə İşçiləri Həmkarlar İttifaqının sədrini qəbul edib

12 oktyabr 2011 14:07 (UTC +04:00)

Bakı. Ramil Məmmədli-APA. Bu gün Azərbaycan Həmkarlar İttifaqları Konfederasiyasının sədri Səttar Mehbalıyev Bakıda səfərdə olan Misirin Səhiyyə İşçiləri Həmkarlar İttifaqının sədri, parlamentin deputatı Abdelhamid Abdelgavad İsmail Xedrı qəbul edib.

APA-nın məlumatına görə, görüşdə S. Mehbalıyev təmsil etdiyi qurum barədə məlumat verərək, bazar iqtisadına keçidlə əlaqədar Azərbaycanda həmkarlar təşkilatlarının qarşılaşdığı problemlər və hazırkı vəziyyət haqda danışıb. Dağlıq Qarabağ problemi, Ermənistanın Azərbaycana qarşı işğalçılıq fəaliyyəti, İranın Ermənistana maddi dəstək verməsi haqqında da fikirlərini bildirən S. Mehbalıyev bildirib ki, ərəb ölkələrinin münaqişə ilə bağlı Azərbaycanı dəstəkləməsindən məmnundur. O, Misirdə baş verən son hadisələrdən sonra bu ölkənin demokratiya və iqtisadi inkişaf istiqamətində irəliləyişə nail olacağına ümidvar olduğunu da söyləyib.

A. Xedr isə öz növbəsində Misirdəki son vəziyyət, həmkarlar təşkilatlarının inqilabdan sonrakı fəaliyyəti haqda məlumat verib. O deyib ki, Misirdə həmkarlar təşkilatları çox mühüm qurumlar hesab edilir: “Misirdə həmkarlar təşkilatlarının ümumilikdə 5 milyon üzvü var. Səhiyyə İşçiləri Həmkarlar İttifaqı isə 350 min işçinin hüquqlarının qoruyur”.
Azərbaycanda sonuncu dəfə 8 il öncə olduğunu xatırladan A. Xedr ölkədəki inkişafın şahidi olduğunu söyləyib: “Xüsusən Bakı çox inkişaf edir. Bu o deməkdir ki, xalq və dövlət inkişafda maraqlıdır”.

Misir parlamentinin deputatı Azərbaycan - Ermənistan münaqişəsinə də toxunub: “Misir xalqı həmişə olduğu kimi indi də Azərbaycanı dəstəkləyir. Biz Dağlıq Qarabağ münaqişəsində də Azərbaycanın yanındayıq və problemin sülh yolu ilə həllini istəyirik”.

Görüş qarşılıqlı maraq doğuran məsələlərin müzakirəsi ilə davam etdirilib.