Sosial

Ana səhifə

Sosial

“Müstəqillik illəri və ekoloji problemlərin həlli” mövzusunda dəyirmi masa keçirilib

13 oktyabr 2011 11:30 (UTC +04:00)

Bakı. Pərvin Abbasov – APA. Bakı Dövlət Universitetində (BDU) Azərbaycanın dövlət müstəqilliyinin bərpasının 20-ci ildönümü münasibətilə Ekologiya və Təbii Sərvətlər Nazirliyi ilə birlikdə “Müstəqillik illəri və ekoloji problemlərin həlli” mövzusunda dəyirmi masa keçirilib. APA-nın məlumatına görə, tədbirdə BDU-nun rektoru Abel Məhərrəmov, ekologiya və təbii sərvətlər naziri Hüseyn Bağırov, nazirliyin əməkdaşları, BDU-nun ekologiya və torpaqşünaslıq, biologiya, kimya, coğrafiya və geologiya fakültələrinin professor-müəllim heyəti və tələbələri iştirak ediblər.

Dəyirmi masanı giriş sözü ilə BDU-nun rektoru, akademik Abel Məhərrəmov açaraq dünyada və Azərbaycanda mövcud olan ekoloji problemlərdən, bu problemlərin həlli məqsədilə müstəqillik illərində dövlət səviyyəsində və BDU-da həyata keçirilən tədbirlərdən danışıb.

Ekologiya və təbii sərvətlər naziri Hüseyn Bağırov “Müstəqillik illərində ekoloji problemlərin həlli: görülmüş işlər və gələcək addımlar” mövzusunda məruzə ilə çıxış edib. Məruzə ətrafında müzakirələr aparılıb, müəllim və tələbələrin suallarına cavab verilib. Tədbirin sonunda təhsildə fərqlənən, ekoloji biliklərin yayılmasında və təbliğində fəallıq göstərən bir qrup tələbəyə Ekologiya və Təbii Sərvətlər Nazirliyinin fəxri fərmanları və pul mükafatları verilib.

Sonra dəyirmi masa iştirakçıları BDU-nun Nano Araşdırmalar Laboratoriyası ilə tanış olublar. Laboratoriyanın müdiri Məhəmmədəli Ramazanov BDU-da Ukrayna Elm və Texnologiya Mərkəzinin koordinasiyası və Kanada dövlətinin maliyyə dəstəyi ilə “Abşeron yarımadası və Bakı şəhərinin ətraf ərazilərinin radioekoloji tədqiqi” adlı qrant layihəsi çərçivəsində tədqiqat işləri aparılması haqqında məlumat verib. O qeyd edib ki, hazırda istər dünyada, istərsə də Azərbaycanın bir hissəsi olan Abşeron yarımadasında texnogen və təbii proseslərin təsiri nəticəsində radioekoloji durum getdikcə mürəkkəbləşməkdədir: “Bu prosesə təsir göstərən həlledici amillərdən biri də ətraf mühitin radioaktiv şüalanma mənbələri ilə çirklənməsidir. Bu baxımdan Abşeron yarımadasının Bakı ətrafı ərazilərində radioekoloji tədqiqatların aparılması olduqca əhəmiyyətli bir məsələdir. BDU-da layihə çərçivəsində Abşeron yarımadası və Bakı ətrafı zonalarda radiasiya fonunun qiymətləndirilməsi və onu yaradan mənbələrin aşkarlanması istiqamətində uğurlu tədqiqat işləri aparılır”.