Sosial

Ana səhifə

Sosial

DSMF Sabunçu rayon şöbəsinin yeni inzibati binasının açılış mərasimi keçirilib

14 oktyabr 2011 11:17 (UTC +04:00)

Bakı. Ramil Məmmədli-APA. Bu gün Dövlət Sosial Müdafiə Fondunun (DSMF) Sabunçu rayon şöbəsinin yeni inzibati binasının açılış mərasimi keçirilib.

APA-nın məlumatına görə, tədbirdə çıxış edən DSMF sədri Səlim Müslümov bildirib ki, prezident İlham Əliyevin rəhbərliyi ilə sığorta-pensiya sistemində aparılan uğurlu islahatlar nəticəsində 2011-cu ildə əhalinin sosial müdafiəsinin möhkəmləndirilməsi xüsusi diqqət mərkəzində saxlanılaraq bu istiqamətdə mühüm addımlar atılıb: “Cari ilin iyulun 1-dən əvvəlki sistemlə təyin olunmuş pensiyaların yenidən hesablanması nəticəsində 900 min nəfərə yaxın əmək pensiyaçısının pensiyası orta hesabla 40 faiz artırılıb. Bununla da bütün pensiyaçılar yoxsulluq səviyyəsindən yuxarı olan pensiya almağa başlayıb”.

DSMF-nin rayon şöbələrində yaradılmış yeni infrastruktur barədə məlumat verən S. Müslümov deyib ki, qurum informasiya - kommunikasiya texnologiyalarının tətbiqi nəticəsində idarəetmə səmrəliliyinin artırılmasına nail olunub: “Son illər fondun 70-dən yuxarı rayon şöbələrində beynəlxalq standartlara cavab verən iş yerləri yaradılıb, müasir informasiya kommunikasiya texnologiyaları tətbiq edilib. Proqramla müəyyən edilmiş tədbirlərin həyata keçirilməsində informasiya kommunikasiya texnologiyalarının tətbiqi vasitəsilə idarəetmədə səmərəliliyin artırılması xüsusi diqqət mərkəzində saxlanılmaqdadır”.

Sabunçu rayon İcra hakimiyyətinin başçısı Əlibaba Əliyev isə Azərbaycanda əhalinin sosial müdafiəsini gücləndirmək sahəsində həyata keçirilən tədbirlərdən danışıb. Ə. Əliyev yeni inzibati binanın istifadəyə verilməsini ölkəmizdə gedən iqtisadi inkişafın göstəricisinin nümunəsi kimi qiymətləndirib.

Binanın açılışını bildirən rəmzi qırmızı lent kəsildikdən sonra tədbir iştirakçıları burada yaradılan şəraitlə tanış olublar. S. Müslümov fondun rayon şöbəsinin işçilərinə sığortaolunanların sayını daha da artırmaq, işləyənlərin sosial sığortaya cəlb edilməsi istiqamətində fəaliyyətin daha da gücləndirilməsi üçün müvafiq tapşırıqlar verib.